Andecha Astur sofita a la hostelería asturiana

Dende’l principiu de que la salú ye prioritaria frente a los criterios económicos, Andecha Astur entiende qu’hai fórmules negociables d’apertura de la hostelería asturiana; desixe compensaciones xustes y apunta a la necesidá d’un nueu conveniu del seutor y una política llaboral activa que garantice’l so cumplimientu.

Énte l’allargamientu del preslle del seutor hosteleru asturianu, y les risibles compensaciones económiques que pa ello destinó’l gobiernu del “Principado”, Andecha Astur quier amosar el so sofitu nala hostelería asturiana, entendiendo que ye preciso buscar fórmules negociables de reapertura, en función de datos oxetivos y non políticos.

Nesti sen Andecha Astur quier rescamplar que la tasa de positividá del andanciu nel nuesu país muévese alrodiu del 5%, ello ye, prósima al criteriu de control consideráu pola OMS, lo que supon una situación abondo meyor que n’otros países europeos onde la hostelería permanez abierta, coles pertinentes llimitaciones y dimposiciones sanitaries, ensin qu’ello implique un empeoramientu de la situación sanitario.

Per otra parte, Andecha Astur ye cosciente de qu’esiste un altu nivel d’ocupación de cames UCIs, y de que tamos sufriendo una alta mortalidá, pero dambes cuestiones nun son responsabilidá de la hostelería, sinón de les polítiques del “Principado”, –denunciaes reiteradamente por Andecha Astur– que foi desmantelando progresivamente la Sanidá Pública Asturiana, privándola de recursos humanos y materiales fasta llegar a la situación d’anguañu na que nun esiste la capacidá precisa pa responder de forma afayaíza a la demanda sanitaria qu’esti andanciu provoca. Esta situación, xunía al avieyamientu de la población asturiana de resultes de la emigración forciada de la mocedá pola destruición sistemática del nuesu texíu socio-económicu, ye la sida de l’alta mortalidá nos pacientes afeutaos pol Covid19.

Fechos dramáticos qu’en manera dala puen ser acotaos a la hostelería, nin van solucionase por cotinuar col preslle de la mesma, y sí con polítiques d’inversión na Sanidá Pública Asturiana, en proteición social y con una defensa activo del texíu socioeconómico asturianu.

Asina mesmo, de responder l’allargamientu del preslle de la hostelería asturiana a criterios oxetivos, resulta indispensable que quien tomen esa decisión, afaye midíes compensatories eficaces, estableciendo aídes direutes y xustes al seutor, acullá de lo puramente publicitario, y mecanismos pa faeles efeutives d’una forma eficiente, de tala miente que lleguen en cantidá, tiempu y forma a les presones afecuaes por esti preslle forzosu.

Andecha Astur entiende que de dalguna manera’l “Principado” ta intentando culpabilizar a la hostelería asturiana de la situación aniciada pol andanciu, intentando esviar l’atención de lo que ta siendo una xestión nefasta del mesmu, siempres en función de lo que determine’l gobiernu central y non de les necesidaes de les asturianes y asturianos. Ello asina, Andecha Astur quier recordar que:

• Magar reconocer el mesmu Adrián Barbón la necesidá d’aisllar Asturies de la población española con altos índices de contaxu, non solo nun lo fixo –Madrid nun lo permitió- sinón que’l “Principado” llevó a cabu una campaña turístico d’Asturies como “destín seguru” que favoreció la masificación turístico con población con altos índices d’afeutación pola Covid-19 qu’actuó como vectores de tresmisión del andanciu n’Asturies.
• Que cuando por causa de too ello, l’andanciu algamó una incidencia insoportable n’Asturies, Adrián Barbón permaneció sumisu a los mandatos del gobiernu central, y renunció a un confinamientu que nesos intres yera urxente pa controlar el so espardimientu.

Per otra parte, la situación de cris na hostelería asturiana dexó n’evidencia la problemática llaboral na hostelería asturiana, apuntando a la necesidá d’un nueu conveniu nel seutor, y sobromanera, d’una política llaboral activa qu’a diferencia de lo qu’asocede anguañu, garantice de forma efeutivo’l so cumplimientu.