La oficialidá del asturianu llega güei al Congresu

Los compañeros d’EH Bildu -Agora Repúbliques- presentaron nel Congresu español una Proposición non de Llei en defensa de les llingües minorizaes del Estáu, roblada por cinco grupos con representación nel Congresu de los Diputaos

El Grupu Parllamentariu Euskal Herria Bildu, Grupu Parllamentariu Republicanu, Grupu Parllamentariu Plural, Grupu Parllamentariu Vascu (EAJ-PNV) y Grupu Parllamentariu Confederal de UP-En Comú Podem-Galicia son los firmantes d’esta PNL en defensa de la realidá plurilingüe del Estáu español, cola que se intenta consiguir que les llingües propies estremaes al castellán tean la so mesma reconocencia y los mesmos drechos y deberes que la llingua oficial de tol Estáu.

La Proposición non de Llei básase nel manifiestu Pluralidá llingüística: llibertá, igualdá y democracia, presentáu por delles asociaciones que trabayen en defensa de llingües minorizaes pol estáu: l’asturianu, l’euskera, l’aragonés, el gallegu ya’l catalán —Iniciativa Pol Asturianu, Kontseilua, Nogara, A Mesa Pola  Normalización Llingüística, Acció Cultural del País Valencía, Ciemen, Escola Valenciana, Ómnium y Plataforma per la Llengua— y recueye 6  compromisos concretos para la protección y dignificación d’estes.

Van yá 20 años que l’Estáu Español robló la Carta Europea de les llingües minorizadas y non solo eso, sinón que la ratificó, alquiriendo’l compromisu de cumplir los sos  dictames. Sicasí, en tolos controles de siguimientu que se fixeron, les cinco evaluaciones que tuvieron llugar nesti tiempu, siempres s’atopen falles y repítese la necesidá de cumplir con esos encamientos, precisos y claros, que la Carta Europea fai y dende Europa desíxese-y al Estáu Español, como firmante, que se tomen les midíes para cumpliles, modificando si ye necesario pa ello les sos lleis. Na atención al ciudadanu, por casu, na Seguridá Social, o nel ámbitu de la Xusticia… l’Estáu tien que faer prevalecer el drechu a l’atención nestes llingües y faer  prevalecer les capacidaes llingüístiques na contratación de funcionariáu.

Na propuesta solicitase que s’impulsen y apreben les reformes necesaries para facer oficiales aquelles llingües qu’entá nun lo son, como ye’l casu del asturianu.