Andecha Astur denuncia l’usu fondos públicos a favor de Duro Felguera

Andecha Astur acusa a PSOE/Podemos/IU de privatizar fondos públicos a favor de la trama político-empresarial de Duro Felguera, y desixe garantizar l’emplegu convirtiendo Duro Felguera nuna empresa pública con participación obrera na xestión

Duro Felguera ye dalgo más qu’una empresa especializá na costrución de bienes d’equipu pa los seutores industrial, petroleru y gasísticu. Dende los sos oríxenes y el so compromisu col franquismu, Duro Felguera ye un exemplu hestóricu de falta d’ética empresarial. Mesmamente anguañu ye investigá pola Audiencia Nacional española por negocios especiales en Venezuela, tien una reclamación de Facienda de más de 100 millones € y ta sometía a arbitraxes y demandes por obres n’Australia, Dubai y Arxelia.

Duro Felguera ye una empresa cuyos xestores sólo s’esmolecieron n’esplotar los recursos d’Asturies, esplotar la so clas trabayaora y rentabilizar la empresa a favor de los sos direutivos y aicionistes, mentantu la descapitalizaben. Asina ye que, n’abril de 2020, Duro Felguera presentó un ERTE y n’agostu d’esi añu solicitó 100 millones € comu aída pública del Fondu de Sofitu a la Solvencia d’Empreses Estratéxiques (FASEE), xestionáu pola Sociedá Estatal de Participaciones Industriales (SEPI); d’esos 100 millones, 30 consistiríen nuna aportación de capital de la SEPI y 70 comu préstamu participativu.

Denunciamos qu’agora, en marzu de 2021, la SEPI, controlá por un Gobiernu español PSOE-Podemos-IU, apreba dir al rescate de Duro Felguera. Tres algamar la empresa un alcuerdu cola banca acredora pa refinanciar la delda sindicá de 85 millones €, la SEPI decide aportar a la empresa 120 millones €, siendo la primer vegá que se rescata una empresa cotizante’n Bolsa. Pero con esta entrá del Estáu nel Conseyu Alministración de Duro Felguera, el Gobiernu español sólo controlará’l 44’8% de la empresa.

Denunciamos qu’agora, en marzu de 2021, el Gobiernu de Barbón, sofitáu por Podemos ya IU, determina entrar nel aicionariáu de Duro Felguera, poniendo en manes del Conseyu Alministración 6 millones € que pagamos toles asturianes y asturianos.

Andecha Astur defende’l drechu a la continuidá nel trabayu de la plantía de Duro Felguera. Magar que nun añu la empresa recortó los puestos de trabayu nun 25%, entá tien 1.200 trabayaores, la mayoría d’ellos n’Asturies. Pero nun creyemos qu’inyeutar fondos públicos ensin más nuna empresa garantice’l so futuru. Si nun s’algam’l control de la empresa, si se caltién el mesmu Conseyu Alministración, si nun hai una reorientación estratéxica de los oxetivos y foncionamientu de la empresa, inyeuta-y fondos públicos ye lo mesmo que regalar a los empresarios cheques firmaos pola clas trabayaora.

Nesta situación de cris grave de Duro Felguera, Andecha Astur desixe un marcu llegal que permita la espropiación rápida de la empresa, ensin drechu a indemnización dala. Y que, una vegá convertía n’empresa pública, se xestione con participación clara de la so plantía trabayaores y con respetu total haza los sos drechos en materia trabayu y seguranza llaboral.

Ye tiempu de que Duro Felguera seya una empresa d’Asturies. Yá ta bien de qu’Asturies seya’l patiu loxísticu de Duro Felguera. Duro Felguera alcordóse d’Asturies en 1938, cuandu, pa que medraren les sos ganancies, emplegó presos que-y emprestó Franco comu man d’obra forciao. Duro Felguera alcuérdase d’Asturies en 2021 cuandu la empresa ta endeldá y descapitalizá, pa pidir a voces millones d’euros públicos pa siguir rucando. Pero Duro Felguera nun s’alcordó d’Asturies cuandu, por exemplu, tuvo un beneficiu de 820.000 € sólo nel primer trimestre de 2019.

Andecha Astur denuncia que l’aportación pública millonaria a les cuentes de Duro Felguera ye parte d’un procesu de redistribución privatizaora de los presupuestos públicos, una forma más que tienen los gobiernos sociolliberales del PSOE-Podemos-IU de favorecer los intereses del gran capital énte los de la clas trabayaora.

Y esa allianza ente los intereses del capital y los de los gobiernos sociolliberales pervese na composición qu’anguañu tien el Conseyu Alministración de Duro Felguera.

• Rosa Isabel Aza Conejo, presidenta’l Conseyu Alministración. Militante’l PSOE. Foi vocal de los Conseyos d’Alministración de la Caxa d’Aforros d’Asturies, SADEI y Telecable; presidenta la Comisión de Control de la Caxa d’Aforros d’Asturies y presidenta los Conseyos d’Alministración d’Aucalsa y Viastur; presidenta la Comisión Nacional del Seutor Postal y de l’Autoridá Portuaria de Xixón; vocal del Conseyu Asesor de Fomentu del Ministeriu Fomentu.
• José María Orihuela Uzal, Conseyeru Delegáu. Foi Conseyeru Delegáu de Sacyr y ocupó estremaos cargos executivos n’empreses de metru, autopistes y aeropuertos.
• José Julián Massa Gutiérrez del Álamo, conseyeru independiente, vocal del Conseyu Alministración y de la Comisión d’Auditoría. Miembru’l PSOE. Foi conseyeru d’Hunosa y Repsol, ente otres empreses, y Sodireutor Xeneral de Planificación Financiera d’Empreses Públiques del Ministeriu d’Economía y Facienda.
• Valeriano Gómez Sánchez, conseyeru independiente y vocal del Conseyu Alministración. Miembru’l PSOE. Foi altu cargu na UXT, Secretariu Xeneral d’Emplegu, ministru Trabayu, diputáu’l PSOE, miembru’l Conseyu Xeneral del INEM.
• Jordi Sevilla Segura, conseyeru independiente y vocal del Conseyu Alministración. Miembru’l PSOE. Tuvo altos cargos nos Ministerios d’Agricultura, d’Economía y Facienda; foi diputáu’l PSOE y presidente del Grupu Rede Llétrica.

Andecha Astur denuncia que la política mafiosa de puertes xiratories sigue colocando a los cabezaleros de partíos políticos españoles al frente de grandes empreses, onde cobren los favores fechos nos sos tiempos de poder gubernamental, pero dende onde tamién siguen defendiendo los intereses del gran capital.

Denunciamos, amás, que los Gobiernos d’Asturies y Madrid intenten xustificar estes polítiques de privatización de los fondos públicos con esculpies insultantes, pola so falta de veracidá y congruencia, lo que supón tratar a los asturianos de fatos fáciles d’engañar.

Asina vemos cómu cabezaleros del PSOE xustifiquen el regalu millonariu a Duro Felguera cola dura cris del coronavirus, comu si nun fore evidente qu’enantes del andanciu los direutivos d’esta empresa yá la llevaben camín d’una ruina planificá. Y tenemos que soportar a cabezaleros de Podemos sofitar el regalu millonariu a Duro Felguera “porque hai qu’aidar a estes empreses estratéxiques a aniciar la tresformación verdi y dixital que desixe Europa”; con tola caradura anuncien que Duro Felguera va dexar de ser una máquina d’estrayer capital pal so aicionariáu pa pasar a ser una guapa y dolce “empresa verdi”. La socialdemocracia española blanquiando siempres el capitalismu.