La cris sanitario pon n’evidencia y agrava la situación llaboral del seutor
Andecha Astur creye que l’andanciu del COVID19 y la cris sanitario consiguiente tán poniendo n’evidencia y agravando la difícil situación llaboral que yá carecíen les y los trabayaores de la hostelería, algamando anguañu unes llendes insostenibles.
Per un llau, el gobiernu español y el de Barbón consideraron, ensin xustificación que paeza suficiente, que la hostelería ye ún de los principales culpables de la espansión del andanciu; cuandu la hostelería adoutó unes midíes de prevención sanitario más severes entá que les qu’apliquen les autoridaes na xestión de los tresportes públicos y privaos de viaxeros.
Per otru llau, el gobiernu español y el de Barbón amosáronse mui sensitibles a los pidíos de los grandes empresarios de la hostelería, nun teniendo la mesma sensibilidá coles vindicaciones y necesidaes de los trabayaores del seutor y colos pequeños autónomos del mesmu.
Comu la cris sanitario s’allarga enforma, ente otres razones pola ineficaz xestión que’l PSOE ta faciendo de les campañes de vacunación, Andecha Astur considera necesario desixir al gobiernu d’Adrián Barbón les siguientes midíes con rellación a la hostelería asturiana, munches de les cuales sólo suponen el cumplimientu escrupulosu del marcu llegal anguañu vixente, incumplíu con descaru y permisividá dende la so esistencia. Asina desiximos:
- Actualización del Conveniu Colleutivu d’Hostelería d’Asturies (data de 2009 y venció en 2011) y de les Tables Salariales (daten del 2011).
- Mentanu nun s’igüe un marcu normativu más afayaízu p’Asturies, cumplimientu del Conveniu Colleutivu d’Hostelería, del Estatutu los Trabayaores y del Alcuerdu Llaboral Estatal d’Hostelería.
- Acabu de les hores estraordinaries impagaes.
- Acabu de los festivos impagaos o asegurar que s’esfruten en forma díes de descansu.
- Acabu de les hores nocherniegues impagaes.
- Respetu del drechu al descansu de dos díes consecutivos, coincidiendo polo menos un fin de selmana al mes.
- Descansu de dolce hores ente xornaes llaborales consecutives.
- Respetu los horarios diarios llaborales fixaos nel contratu.
- Respetu la categoría llaboral fixá nel contratu.
- Desaniciu la práutica de firmar rexistros horarios falsiaos.
- Desaniciu’l prorratéu de les pagues estraordinaries.
- Entrega d’uniformes completos, ropa y calzao, afayaízo pa la categoría llaboral que se tien.
- Firma’l contratu enantes del so unvíu telemáticu al SEPE, pa torgar abusos empresariales posteriores (cláusules abusives amestaes, xornaes non pautaes, etc.).
- Les empreses o empresarios autónomos d’hostelería sólo podrán algamar aídes públiques si nun foron condergaos en sentencia firme por delitos escontra los trabayaores, por incumplimientu del Conveniu Colleutivu, por impagos a los trabayaores, por fraude a la TGSS, por tener trabayaores ensin asegurar o con xornaes illegales, por fraude nel rexistru de control horariu de los sos trabayaores, por impagu d’hores estraordinaries, por impagu de díes festivos, por nun respetar los descansos selmanales o’l descansu ente xornaes.
- Polítiques d’ispeición fiscal y d’ispeición llaboral eficaces, que permitan controlar que los empresarios del seutor hosteleru respeten, comu les demás estayes, unes obligaciones fiscales y llaborales afayaíces pa una sociedá más xusta.
