Andecha Astur felicicita a la ciudá de Xixón por lliberase de l’Avenía Juan Carlos I y pide a la Casa Conceyu un esfuerciu más pa desespañolizar los nomes de les cais de Xixón
En xunetu de 2020 Andecha Astur propunxo a la Casa Conceyu de Xixón camudar el nome l’Avenía Juan Carlos I. Ente les razones del nuesu pidíu taba qu’esi rei español yera herederu direutu de Franco y que’l vieyu rei tien un curriculum vergoñosu no que cinca a tráficu d’influyencies, cobru comisiones, ocultación de padremuñu monetariu, evasión fiscal y otros presuntos delitos.
Nos meses siguentes fuimos partícipes d’un importante movimientu de rempuesta popular, “Asturies nun tien rei”, que cellebró varios actos refugando la presencia los Borbones n’Asturies. Ún d’ésos foi la sostitución de la placa col nome d’Avenía Juan Carlos I.
Obligá pola presión popular, l’alcaldesa de Xixón fizo público, n’agostu de 2020, qu’asumía la retirá del nome a esa avenía y que tomaría un tiempu pa decidir cuála yera la nuea denominación de la vía. Mediu añu foi’l plazu que l’alcaldesa consideró necesariu pa que intentar disimular que’l so determín respondía a la presión ciudadana escontra los Borbones. Ye igual. Quedó ñidio qu’Asturies nun tien rei, nin lu quier. Y agora la Casa Conceyu de Xixón, forcía poles circustancies, va poner a esa vía’l nome de José Manuel Palacios, el primer alcalde de Xixón na dómina “democrática”. Nun lo vemos mal, Palacios foi un alcalde del PSOE pero polo menos foi honráu dafechu, non comu Areces; poro, abúltamos una llaceria sinificativa que la cai de Palacios entronque cola que’l PSOE dedicó a Tini Areces en Xixón.
De toles maneres, Andecha Astur fae una valoración perpositiva del procesu siguíu fasta agora pa llogar la desapaición del nome de Juan Carlos I. Foi un bon trabayu de tola sociedá asturiana que se quier lliberar de la monarquía española. Y nun foi una concesión fácil. Foi un llogru conquistáu, porque l’alcaldesa de Xixón ye bien conocía comu fan númberu ún de los Borbones españoles, por dalgo forma parte del patronatu de la Fundación Princesa.
Agora Andecha Astur propón a la Casa Conceyu de Xixón un caberu esfuerciu pa desespañolizar les cais de la ciudá, afitando’l vezu de poner nomes populares o rellacionaos cola cultura, la hestoria y la identidá d’Asturies. Un gobiernu municipal PSOE-IU-Podemos nun debería tener problema pa ello, polo menos según se publiciten ellos, a nun ser que xenéticamente nun puean dixebrar la so aición política de la so condición de partíos españoles.
