Responsabiliza al gobieru del “Principado” y propón a la Comisión Europea una serie de midíes de control
Pernando Barrena, europarllamentariu d’EH Bildu (coalligáu con Andecha Astur y otros partíos nacionaliegos col nome “Agora Repúbliques”) vien de presentar nel Parllamentu Européu una serie d’entrugues ya iniciatives d’Andecha Astur sobro la esmoleceora contaminación atmosférica que carez la ciudá de Xixón, materia sobro la que la Comisión Europea tendrá de posicionase dientru poco. Precisamente la calidá l’aire ye ún de los oxetivos prioritarios que diz tener la Xunión Europea na so aición nos caberos años. Y los grupos parllamentarios d’esquierdes llevaron al Parllamentu européu hai unos meses a desixir a la XE una llexisllación más estricta en materia de polución atmosférico.
Andecha Astur, na so iniciativa énte la Xunión Europea, denuncia a la Casa Conceyu de Xixón y al Gobiernu asturianu por ser frecuentemente acusaos d’ocultar datos ñegativos sobro la contaminación del aire na principal ciudá astur, tapeciendo los resultaos de dalguna estación de medición de la calidá l’aire. Barbón y la FSA-PSOE prefieren favorecer les cuentes de resultaos de les grandes empreses contaminantes enantes que garantizar la salú los asturianos.
Denunciemos que Xixón, ente otros tipos de contaminación, sofre de contino niveles non permitíos de NO2, partícules PM10, PM2,5…, mentantu la Casa Conceyu de Xixón y el Gobiernu asturianu nun faen un res pa torgar que faiga rialidá l‘estudiu espublizáu hai un tiempu na revista «Journal Atmospheric Chemistry and Physics», onde s’inclúi la ciudá de Xixón ente les más contaminaes d’Europa nel añu 2030.
Andecha Astur pide a la Comisión Europea que determine si la rede d’estaciones de control de calidá l’aire qu’hai en Xixón ye o non suficiente, si ye o non eficaz la so distribución territorial y si los parámetros de calidá de les estaciones son o non homologables.
Dende la nuesa coalición “Agora Repúbliques”, tamien pidimos a la Comisión Europea qu’evalúe los protocolos de la Casa Conceyu de Xixón y del Gobiernu asturianu que son d’aplicación nuna situación de cris por contaminación del aire, controlando especialmente’l tratu que nesos protocolos reciben les industries siderúrxiques asitiaes nel oeste la ciudá y les empreses graneleres qu’operen nel Puertu d’El Musel.
D’igual mou pidimos a la Comisión Europea que se posicione sobro los niveles de contaminación de Xixón (de los más altos del continente), qu’aperie mecanismos estraordinarios pa obligar a Cases Conceyu y a Gobiernos nacionales a espublizar los braeros datos de les sos estaciones de midición de la calidá l’aire, y, a lo cabero, qu’igüe una direutiva específica y urxente p’atayar el deterioru l’aire nes ciudaes que, comu Xixón, carecen los mayores niveles de contaminación atmosférico d’Europa.
