Un añu más Barbón ñegase a distinguir a los postreros guerrilleros del país, dexando n’evidencia que lo del PSOE más qu’españolismu ye pura asturfobia
Andecha Astur sofitó la propuesta de la Federación Asturiana Memoria y República (FAMYR) pa que’l Gobiernu d’Asturies concediera la Medalla d’Asturies a Vicente García Riestra, Felipe Matarranz, Comandante Robert y Cristino García, honrándolos pol esfuerciu y compromisu d’haber sío los caberos guerrilleros na defensa d’Asturies escontra les fuercies españoles de Franco.
FAMYR y Andecha Astur son dos de les organizaciones que collaboren na plataforma “Asturies nun tien rei” y, nesti tiempu de collaboración, siempres supieron consensuar un discursu común d’analís de la rialidá asturiana y de reconocencia de los drechos sociales y políticos del Pueblu Asturianu. Nesi entendimientu, Andecha Astur lleva varios años sofitando la propuesta de FAMYR pa que’l Gobiernu asturianu honre con distinciones a los caberos guerrilleros del país.
Sicasí, esti añu Adrián Barbón amosó enforma bien la so condición de lacayu del Reinu d’España: ñega la medalla a los guerrilleros asturianos y concédela a la conocía comu “Comisión de los 8”, los ochu miembros de la comisión qu’apautó l’Estatutu d’Autonomía p’Asturies: Francisco Sosa Wagner (PSOE), Bernardo Fernández (PSOE), Juan Bautista Fernández Hidalgo (UCD), Juan Casero Lambás (UCD), Francisco Bastida Freijedo (PCE), Ignacio de Otto (PCE), Juan Luis de la Vallina Velarde (AP) y José Manuel Riesco Morán (AP).
Barbón y la FSA-PSOE prefieren distinguir a políticos españoles fieles, cuyu méritu foi maniatar a Asturies con un Estatutu impuestu dende Madrid que mos torgaron votar, que ñegaron la identidá hestórica, política, cultural y llingüística del nuesu país y que mos ñegaron el drechu a decidir el futuru, hipotecándomos al que tuviere’l Reinu d’España.
Ensin vergoña dala, Barbón y la FSA-PSOE siguen condergando al escaezu y al desagradecimientu a los querrilleros que defendieron fasta’l caberu minutu’l drechu a la llibertá d’Asturies y el so Pueblu. Nun hai ná que desplique meyor qué proyeutu políticu representa Barbón.
Pela nuesa parte, en comuña con otres organizaciones, comu FAMYR y la plataforma “Asturies nun tien rei”, siguiremos desixendo pa los nuesos guerrilleros el mayor de los reconocimientos oficiales. Porque na Memoria Hestórica del Pueblu Asturianu yá tienen un sitiu d’honor.
