Andecha Astur vien de presentar na Casa Conceyu de Xixón una propuesta pa camudar el nome de la «Avenida Príncipe de Asturias» pol de «Avenía de la Sanidá Pública Asturiana», col enfotu de desmonarquizar les cais del conceyu al empar que n’homenax a los méritos amosaos pol presonal sanitariu del nuesu país demientres l’andanciu prevocáu pol coronavirus
La propuesta, presentada de magar l’ésitu de la presentada anteriormente pola organización y gracies a la cuala camudóse’l nome de la cai Juan Carlos I, pretende per un llau avanzar nel esaniciu de los vestixos monárquicos españoles esistentes na ciudá, y al empar reconocer los méritos del presonal de la Sanidá Pública Asturiana demientres l’andandiu prevocáu por coranovirus, al empar que se sofita la propia Sanidá Pública Asturiana frente a les polítiques de privatización de la sanidá llevaes alantres pol gobiernu del «Principado».
La propuesta diz asina:
PRIMERO.- Que na ciudá de Xixón esiste la conocía comu “Avenida del Príncipe de Asturias”, que ñaz a continuación de l’Avenía de Garpar García Laviana y fina al empiezu l’Avenía d’Eduardo Castro, espardiéndose pelos tarrenos de los códigos postales 33212 y 33213.
SEGUNDO.– Que la figura del “príncipe” y del “principado” d’Asturies tien el so orixen hestóricu en 1388 nunos fechos llamentables colos que la Corona castellana, ocupá entós pol rei Juan I, quinxo castigar Asturies, asegurando’l so sometimientu a la so corona y dando acabau a los intentos de gobiernu independiente que se daben n’Asturies.
TERCERO.- Qu’anguañu apropiáronse d’esi títulu los herederos de los reis d’España, tando agora venceyáu a la presona de la ciudadana Leonor de Borbón y Ortiz. La familia Borbón heredó la so corona, nesta parte cabera de la hestoria, direutamente del dictaor facista Francisco Franco Bahamonde, ensin tener pasao enxamás por denguna votación democrática que proclamare específicamente un réxime monárquicu nel Estáu español.
CUARTO.- Qu’amás, comu ye público y notorio, la familia Borbón presenta un curriculum vergoñosu en cuantes a presuntu tráficu d’influyencies, cobru comisiones, ocultación de padremuñu monetariu, evasión fiscal y otros presuntos delitos, motivos polos que fasta fuxó del Estáu, renunciando a la corona, el so anterior titular, Juan Carlos I de Borbón.
QUINTO.- Que la ciudá de Xixón ye, por llarga tradición hestórica, un llugar asturianu y obreru amante de la democracia, de la exemplaridá cívica y de la igualdá ente la ciudadanía, asina comu un llugar querenciosu siempres de la memoria hestórico y de modelos sociales de progresu.
SESTO.- Que la Casa Conceyu de Xixón sabe ser sentible ente situaciones comu la descrita, comu preba bien el fechu de qu’hai poco, comu propunxo formalmente Andecha Astur, retiró la cai que Juan Carlos I tenía na ciudá.
SÉTIMO.- Que tolos fechos asoleyaos indiquen que lo más razonatible, xusto y democrático ye que na ciudá de Xixón nun hebia denguna vía pública o elementu urbanísticu que sirva de remembranza y homenax a los titulares o herederos de la corona rial española.
OCTAVO.- Que, dao que la Casa Conceyu de Xixón diz tar goberná por una mayoría progresista d’esquierdes conformá por PSOE ya IU, y que pue cuntar col sofitu de Podemos, de xuru-y resultará cenciello compartir los argumentos espuestos y, darréu, tomar el determín democráticu que pidimos, comu yá fizo nel casu de la desapaecía Cai Juan Carlos I.
De mou que, pola importancia de tolo enantes desplicao y pola necesidá evidente de caltener una convivencia ciudadana en condiciones de coherencia, dinidá y democracia,
SOLICITA:
Que la Casa Conceyu de Xixón considere nuna sesión plenaria la necesidá y procedencia de camudar el nome de la “Avenida del Príncipe de Asturias”, proponiendo comu alternativa’l nome de “Avenía de la Sanidá Pública Asturiana”, n’homenax a los méritos amosaos pol presonal sanitariu del nuesu país demientres l’andanciu prevocáu pol coronavirus.
Que la Casa Conceyu facilite a quien esto robla información sobro la tramitación del pidíu que se presenta.
Per agora yá saquemos alantre la nuesa propuesta de quitar la cai al rei eméritu español, seguiremos con más iniciatives asemeyaes. Seguirán cayendo otres…#AsturiesNunTienRei #RepúblicaAsturiana #FuturupAsturies pic.twitter.com/MYkfhzmwVE
— Andecha Astur (@andechaastur) July 27, 2021
