Andecha Astur defende la prohibición d’estes matances pola so xabacidá y porque nun representen la rellación tradicional d’Asturies col so entornu y denuncia que PSOE, IU, Podemos y PP caltienen les matances de toros comu modelu d’imposición cultural.
Con motivu les matances de toros que, con sofitu públicu, se van facer n’agostu en Xixón y en Cangues d’Onís, Andecha Astur comparte públicamente delles reflexones y dalgunos pidíos que presenta a les autoridaes municipales y asturianes.
Nos tiempos de gobiernu del PP, l’Estáu español blindó llegalmente les matances de toros, aprebando la Llei 18/2013, de 12 de payares, “pa la regulación de la Tauromaquia comu padremuñu cultural” (BOE 13/11/2013). Esta llei, de llamentable memoria, afita que la matanza toros ye “parte esencial del Padremuñu Hestóricu, Artísticu, Cultural y Etnográficu d’España”.
Si foi llamentable que la drecha española blindare estes matances comu arte, más lo foi entá que’l Gobiernu español qu’agora sofiten PSOE y Podemos (“el más progresista de la hestoria”) nun entainare a desactivar una llei que, comu ésta, protexe espeutáculos sangrientos propios de dómines medievales, blanquiándolos comu espeutáculos culturales.
Si PP llantó esta llei y si PSOE y Podemos la caltienen ye porque hai dalgo que-yos importa muncho más que la sofrencia los animales: siguir imponiendo un modelu cultural únicu y español a tol territoriu l’Estáu. El valor de la tauromaquia comu preséu d’españolización, eso ye lo que defenden. Col meyor estilu franquista: pan y toros.
Yá lo supo analizar José Luis Corcuera, el “democráticu” ministru’l PSOE que llegalizó la patá policial na puerte la to casa. Fízolo l’añu pasáu cuandu declaró a la prensa que «persiguen los toros los mesmos que quieren finar cola Transición».
Ciertamente, les asturianes y asturianos que creyemos que la Transición foi un actu fallíu del teatru políticu español, criticamos aquel momentu hestóricu porque regaló la imunidá a la dictaura franquista, porque reconoció a los Borbones comu herederos de Franco, porque habilitó un nueu réxime políticu controláu pola burguesía y el capital, porque nun reconoció en condiciones d’igualdá los drechos de la clas trabayaora frente a la casta poderosa, porque ñegó los drechos hestóricos de los pueblos que (comu Asturies) tán sometíos pol Estáu español, porque nun reconoció la esistencia de la llingua d’Asturies… y porque protexe comu “fechos culturales” costumes españoles tan xabaces comu la matanza toros.
Poro, n’Andecha Astur defendemos una Asturies llibre, llibre de matances de toros, d’espeutáculos sanguinarios que se mazcariten d’enventos culturales, de folixes de sangre qu’estimulen lo pior de della xente, d’amueses públiques de tortura que se publiciten comu arte… Una Asturies llibre d’imposiciones de modelos culturales ayenos a los nuesos, porque la tradición que’l Pueblu Asturianu tien de compartir el territoriu col so ganao ye, comu se sabe y se ve, bien estremá de la española.
En defensa d’esa Asturies de progresu que mos pruye, dende Andecha Astur pidimos al Gobiernu d’Asturies, sofitáu por PSOE/IU/Podemos, qu’aprebe una llei de non maltratu de los animales, qu’incluya comu maltratu y tortura les matances de toros. Persabemos qu’eso va dar orixe a un conflictu col Tribunal Costitucional español y colos grupos de presión del españolismu taurín, pero hai qu’atalantar esos conflictos comu ocasiones importantes pa recuperar la capacidá política autónoma del Gobiernu asturianu y p’avanzar nun alderique social que fine coles matances de toros.
Pidimos a la Casa Conceyu de Xixón, con una alcaldía sofitá por PSOE/IU, que rescinda los contratos asumíos pa la cellebración de matances de toros na ciudá y que camude les ordenances municipales necesaries pa regular ñidiamente que la Plaza Toros de Xixón sólo se podrá usar n’eventos culturales que nun incluyan matances, nin maltratu o ofensa a la dinidá y drechos de los pueblos, les presones y los animales.
Pa finar, pidimos a la Casa Conceyu de Cangues d’Onís, rexía pol PP, que desautorice la matanza nuvielles prevista pal prósimu 22 d’agostu entamá pola «Fundación Toro de Lidia», asina como cualisquier otru espeutáculu que nel futuru se quiera cellebrar nel conceyu ya incluya maltratu o muerte d’animales.
