Esti domingu 22 d’Agostu, Andecha Astur homenaxea la Declaración de Soberanía del Conseyu d’Asturies y Llión, independizándose a toles efeutos de la República Española.
El 24 d’agostu de 1937 los asturianos independizábense de fautu de la República Española, proclamando’l Conseyu Soberanu d’Asturies y Llión, entamando un procesu hestóricu que-y valió la so reconocencia a nivel internacional, enfrentándose al exércitu franquista español y a los sos alliaos alemanes ya italianos. Sicasí, el so valor nun valió pa que los asturianos algamaren el respetu nin l’aprebación de la República española, qu’antepunxo esplícitamente la xunidá d’España a la llucha antifacista, llegando a pidir la rendición y a considerar un alliviu l’acupación d’Asturies poles tropes facistes.
L’actu tendrá llugar el sábadu 22 d’agostu nel Puertu Tarna. A les 10:30 xubiráse a les trincheres de L’Abidular – Filispardi y a les 13:30 tendrá llugar l’homenaxe propiamente dichu al pie del monumentu que fai alcordanza d’esta hestórica declaración que dio aniciu a la cabera istitución democráticamente escoyía polos asturianos.
Con esti actu homenaxease la hestórica declaración, fecha’l 24 d’agostu de 1937, pola que’l Conseyu d’Asturies y Llión declarábase soberanu ya independiente de la República española:
«Artículul 1.- El Conseyu Interprovincial d’Asturies y Lleón, de magar la fecha y hora de la promulgación d’esti decretu, costitúise en Conseyu Soberanu de gobiernu tol territoriu de la so xurisdición y a elli queden dafechamente sometíes toles xurisdiciones y muerganismos civiles y militares que foncionen o vaigan foncionar de secute dientru’l mentáu territoriu.»
Esta proclamación soberanista permitió qu’Asturies entamare un auténticu procesu revolucionariu y se defendiera heróicamente del exércitu facista español/italianu/alemán, pero enxamás nun cuntó cola aprebación de la República española, que llegó a considerar un alliviu l’acupación d’Asturies poles tropes facistes énte la posibilidá de qu’Asturies fuere reconocía internacionalmente como nación independiente, talo como solicitó Belarmino Tomás, Presidente del Conseyu Soberanu, a la Sociedá de Naciones.
La falsa transición política cola que continuó’l franquismu non solo nun permitió recuperar esta auténtica istitución d’autogobiernu, sinon qu’impunxo dende Madrid –ensin que’l Pueblu Asturianu pudiere votalo- un “Principado” y un Estatutu descontestualizáu hestoricamente y sociolóxicamente ayenu a la sociedá asturiana, condergándomos a la situación de colonialismu que carecemos anguañu.
Pa facilitar la participación, cuntaráse con autobús, siendo preciso reservar plaza bien per corréu lletrónicu: andechainfo@gmail.com
