- La denuncia presentada énte la Fiscalía Superior d’Asturies afeuta direutamente al empresariu la plaza, al ganaeru y a dos toreros.
- Siñálase la responsabilidá política de l’alcaldesa Xixón na matanza de dos toros nomaos “Nigeriano” y ún nomáu “Feminista”, por permitir qu’una corría se convirtiere nun actu de vindicaciones racistes y facistes
Andecha Astur vien de presentar énte la Fiscalía Superior d’Asturies una denuncia por presuntu delitu d’odiu escontra cuatru responsables de la matanza toros que se fexo en Xixón el 15 d’agostu, onde se dio muerte a dos toros col nome de “Nigeriano” y a otru nomáu “Feminista”.
Les cuatru presones acusaes de supuestu delitu d’odiu son:
- Carlos Zúñiga fíu, xerente y alministraor de la empresa Circuitos Taurinos, S.L., que tien concedía la xestión de la plaza toros xixonesa.
- Daniel Ruiz Yagüe, propietariu de la ganadería del mesmu nome, qu’aportó los seyes toros pa la corría’l 15 d’agostu.
- Antonio Morante Camacho, Morante de la Puebla, mataor de toros que s’encargó de dar muerte al toru “Nigeriano” y al toru “Feminista”.
- Julián López Escobar, El Juli, mataor de toros que s’encargó de dar muerte a otru toru de nome “Nigeriano”.
P’Andecha Astur los vergoñosos fechos asocedíos na matanza toros del 15 d’agostu representen un claru delitu d’incitación al odiu, a la hostilidá, a la discriminación y a la violencia por motivos racistes, pola pertenencia a una etnia, raza o nación, por razones ideolóxiques y de xéneru. El delitu d’odiu ta reguláu nel artículu 510 del Códigu Penal y conlleva penes d’ente 6 meses y 4 años de cárcele, amás de multes.
Andecha Astur siñala tamién la responsabilidá política que nestos fechos tien l’alcaldesa de Xixón, Ana González, por tener permitío toos estos años les matances de toros na plaza xixonesa y porque ye la responsable política de que s’utilizare esa istalación pa la eshibición d’un llamáu públicu al odiu por motivaciones racistes y de discriminación ideolóxica.
Ana González ye la responsable última de que la ultradrecha española (taurina y política) convirtieren la matanza toros del díi de Begoña nuna vindicación pública y publicitá d’ideoloxíes racistes y facistes. Nun foi denguna casualidá que mataren los toros “Feminista” y “Nigeriano” dalgunos toreros públicamente vinculaos a Vox, que’l ganaeru facilitare esos nomes a los animales y qu’esfrutaren del espeutáculu facista dende les graes Rocío Monasterio, presidenta de Vox Madrid, ya Iván Espinosa de los Monteros, portavoz de Vox nel Congresu español. L’alcaldesa, comu responsable de la plaza, tien la responsabilidá de supervisar lo que se fae ellí y la obligación de torgar que s’escenifiquen públicamente prevocaciones facistes comu la que denunciamos.
