Compromisu de trabayu y llucha nel homenax d’Ochobre’34

Al actu acudieron familiares de Belarmino Tomás, postrer presidente d’una Asturies llibre y socialista

Una representación de cuatru familiares de Belarmino Tomás, ente ellos la ñeta Mai Tomás y la bisñeta Carmela, acudió dende Madrid pa participar nel homenax qu’Andecha Astur fae tolos 12 d’ochobre al presidente del Tercer Comité Revolucionariu (1934) y del Conseyu Soberanu d’Asturies y Lleón (1937).

Militantes y simpatizantes d’Andecha Astur cellebraron esti homenax d’ochobre, comu ye vezu, énte la tumba’l presidente, asitiá nel cementeriu Pandu (Llangréu). L’oxetivu d’esti actu ye duple: per un llau reforciar la Memoria Hestórica d’Asturies, calteniendo vivu’l nome y l’exemplu que pa una Asturies llibre y socialista representa Belarmino Tomás y toles asturianes y asturianos del so tiempu que llucharon na Revolución d’Ochobre y declararon la República Obrera y Campesina d’Asturies; per otru, representa un actu d’afitamientu del nuesu compromisu pa trabayar social y políticamente pol futuru d’Asturies y de la so clas trabayaora.

Sicasí, esti añu l’actu tuvo un formatu bien especial y peremotivu, cola participación de la ñeta y bisñeta’l presidente, que dexaron un ramu roses roxes so la tumba onde ta’l güelu de Mai Tomás (Belarmino Tomás), la so güela (Severina Vega) y el so pá (Agripino Tomás). Mai Tomás dirixóse a los asistentes al homenax p’agradecer el so compromisu persistente cola figura’l so güelu, denunciando al empar l’escaezu con que’l Gobiernu y les organizaciones polítiques a les que Berlarmino perteneció traten la so memoria, el so exemplu y el so llabor políticu; Mai Tomás dixo tenelo ñidio: esi escaezu ye intencionáu y débese a que’l sintir políticu y la práutica política de Belarmino Tomás foron y entá son pelligrosos pal sistema que caltienen esti Gobiernu y les organizaciones a les que Belarmino Tomás perteneció. La ñeta tamién remembró que’l llabor políticu´l presidente sofitóse siempres en lluchar pol futuru de la clas trabayaora y en garantizar qu’ella pudiere escoyer el so camín. Finó diciendo que la vida y l’ación política de Belarmino Tomás foron y son un exemplu p’Asturies, pal Estáu español y pa tolos pueblos del mundiu que lluchen por un futuru llibre y meyor pa toos.

La importancia d’alliase pa decidir el futuru

Tres la solemne música de gaita y la colocación d’un ramu lloréu cola bandera d’Asturies, Mariu Arbesú, miembru la Xunta Executiva, faló en nome d’Andecha Astur. Agradeció la presencia la familia de Belarmino Tomás, repasó la so trayeutoria política y señaló la obligación que tenemos los asturianos de caltener viva la so memoria. Mariu Arbesú denunció tamién la responsabilidá que’l Gobiernu asturianu y el PSOE tienen por tapecer demientres más de 80 años la figura inmensa de Belarmino Tomás; al tiempu que desplicó los motivos: si reconocieren comu se debe al presidente, lo mesmo al Gobiernu qu’al PSOE cayería-yos la cara de vergoña polo qu’ellos mesmos son y representen na rialidá política de l’Asturies d’anguañu, con un réxime corrutu dafechu, monárquicu y faltu democracia.

Mariu Arbesú tamién señaló la importancia que Belarmino Tomás y José María Martínez, dirixente de la CNT asturiana, dieron entós a l’Allianza Obrera y señaló’l valir qu’esi mensax tien tovía güei, comu preséu pa siguir lluchando pol futuru d’Asturies, un futuru que ye vidable y que ta nes nueses manes. Pa finar, denunció la maniobra de despiste que supón reformar l’Estatutu d’Autonomía, pa siguir siendo un “Principado” sometíu al que se-y quier ñegar el so drechu a decidir.

L’Estatutu d’Autonomía, el xugu políticu pa un “Principado”

Andecha Astur, amás d’esti emotivu homenax a Belarmino Tomás, tamién organizó otru, una hora enantes, a los Mártires de Carbayín. Nel cementeriu Carbayín intervino, en nome d’Andecha Astur, Llucía Fernández, de la so Xunta Executiva, y tamién equí hebio ofrenda floral y música gaita.

Nel so discursu d’homenax remembró ún a ún los nomes de los 24 mártires de Carbayín, nun ambiente d’especial respetu y solemnidá. Llueu, Llucía Fernández, rellacionando’l dechu a decidir que se defendía entós y agora, señaló la tremenda incoherencia que representa dicir ser socialista, comu Adrián Barbón, y afalar la reforma d’un nueu Estatutu d’Autonomía pa un “Principado”, un testu que nun ye más qu’una nuea versión del xugu políticu con que s’aten en curtio los drechos de la clas trabayaora asturiana.

D’Adrián Barbón tamién dixo que pervertía les espresiones “drechu a decidir” y “futuru p’Asturies” ca vegá que les emplegaba; que’l drechu a usar llexítimamente eses pallabres correspondió-yos nel so momentu a los 24 mártires que llucharon por ello y correspuende agora a organizaciones comu Andecha Astur y al Pueblu Trabayaor Asturianu, que siguen defendiendo la llibertá comu clas y comu Pueblu.

Pa finar, Llucía Fernández señaló’l compromisu hestóricu de la mocedá asturiano col progresu’l país, amosando’l so convencimientu de que les moces y mozos del nuesu Pueblu siguirán sabiendo tar ehí, na primer filera de la ciudadanía dimpuesto a lluchar por una Asturies llibre y socialista.