Considera inaceptable que mintiera a la hora d’informar cual yera’l momentu concretu nel que s’afaya’l procedimientu alministrativu y en cuantu a les actividaes a desendolcar pola empresa
Andecha Astur sofita la denuncia pública que la Plataforma “Oru non” fae sobro les declaraciones del Conseyeru d’Industria alrodiu la mina d’oru de Salave. Ye cierto qu’Enrique Fernández, Conseyeru d’Industria, mintió nes sos declaraciones sobro la mina. Mintió en cuantes a cuál ye’l momentu concretu nel que s’afaya’l procedimientu aliministrativu pa la so autorización. Y mintió en cuantes a cuáles puen ser les actividaes que desendolque la empresa en cuantes consiga una declaración d’impautu favoratible pal so proyeutu d’esplotación.
N’Asturies hai un rechazu ñidiu a la minería l’oru, porque ye reconocía comu una actividá estrautiva con un altu nivel d’agresión mediuambiental y que tampocu nun xenera modelos empresariales duratibles, nin tien grandes plantíes nin se corresponsabiliza de les consecuencies de la so actividá. Bona preba d’esto cabero, ye cómu’l Gobiernu d’Adrián Barbón va gastar agora 82’4 millones € pa restaurar tres vieyes mines a cielu abiertu n’Ibias, Degaña y Tinéu, quedando esentes d’esta responsabilidá los empresarios correspondientes.
Cuandu un conseyeru miente, comu la fae Enrique Fernández, y la so mentira sólo val pa protexer a la empresa minera y pa tapecer los daños mediuambientales que supondrá la so actividá, la ciudadanía sólo pue barruntar estrañes rellaciones d’intereses ente la empresa y el conseyeru en custión.
Mentir a la ciudadanía ye impresentable, pero mentir por intereses ocultos ye inmoral y una presunta corrución.
Asturies necesita conseyeros que defendan los intereses de les asturianes y asturianos; siempres mos sobraron cargos políticos dimpuestos a trabayar al sirviciu los intereses de les grandes empreses y el capital (Villa, Areces, Riopedre y un cientu más).
Asturies merez un sistema políticu de representación bramente democráticu, nel que los cargos tean controlaos pola ciudadanía, nel que nun se puea eternizar una casta ayena a los intereses populares.
Comu primer pasu p’avanzar haza esi modelu ta’l necesariu cese o dimisión de los conseyeros que, comu ésti, queden retrataos públicamente.
