Pol futuru d’Asturies: República Asturiana sí, Borbones non

Andecha Astur llama a les asturianes y asturianos a participar esti vienres, 22 d’ochobre, a les 17 h., na Plaza La Escandalera, d’Uviéu, na concentración convocá escontra la presencia n’Asturies de los Borbones y escontra los actos monárquicos qu’entama la so Fundación Princesa.

Remembramos la importante rempuesta social que l’añu pasáu dio Asturies a delles visites de los monarques a Asturies, cola campaña “Asturies nun tien rei”. Esti añu tovía tenemos dalguna razón más pa refugar esta visita de tipu colonial.

El futuru d’Asturies nun ye continuar siendo un “Principado” de naide. Asturies refuga esa condición, que sólo tien una desplicación hestórica: poner al frente d’Asturies un príncipe español foi la ferramienta de control políticu con que la corona española quinxo asegurar el sometimientu d’Asturies a los sos intereses.

Asturies nun ye “Principado”. Somos una nación hestórica, somos un Pueblu con identidá propia y drechu a escoyer llibremente’l nuesu futuru. Y comu somos un Pueblu que nagua por ser llibre y vivir democráticamente, la única opción que tenemos ye l’entamu d’una República Asturiana. Esta fórmula ye, amás, pola que tradicionalmente apostó siempres el movimientu obreru asturianu nos momentos en que decidió garrar nes sos manes la escoyeta’l so futuru: asina’n 1934 declaróse la República Obrera y Campesina d’Asturies y en 1937 entamóse’l Conseyu Soberanu d’Asturies y Lleón.

De mou que vindicar angañu una República Asturiana resulta coherente, democrático y cuaya bien cola nuesa tradición hestórica.

Participaremos na concentración pa refugar la visita los Borbones y pa denunciar que la reforma estatutaria que quieren apautar los partíos españoles. Aceutar otra vuelta un Estatutu d’Autonomía otorgáu y que prorroga’l castigu de ser “Principado” de los Borbones representa lo más vieyo y retrógrado de les posibles opciones polítiques. Y repetir l’alcuerdu de los partíos españoles de que los asturianos nun podamos votar esi Estatutu ye la preba de que tamos sometíos a un réxime foriatu y non democráticu.

Por toes estes razones, el vienres vamos dicir non a los Borbones, non al “Principado”, non al Estatutu d’Autonomía. Y vamos dicir sí a ser un Pueblu soberanu, sí a escoyer en llibertá y democracia’l nuesu futuru, sí a una República Asturiana.

Porque, amás, ye l’únicu camín pa salir d’esta cris social, llaboral, económica, demográfica… na que mos tien somorguiaos l’Estáu español.