Llama a participar nel manifestamientu de mañana y desixe a Barbón un plan de sofitu a la ganadería y agricultura asturiana
Andecha Astur amuésase solidaria coles vindicaciones qu’esti xueves va llevar a les cais d’Uviéu la xente del campu astur, convocaos pola asociación Asturies Ganaera.
- Precios de la carne y la llechi non comprometíos polos intereses de les grandes corporaciones.
- Proteición llegal de los seutores productivos tradicionales d’Asturies (edificabilidá de cuadres y naves, xestión de purines, tamañu les esplotaciones, control de precios de la lluz, gasóleo y piensos) y sofitos económicos.
- Torna de los montes comunales a los sos propietarios populares.
- Reconsideración de les polítiques de control de daños del llobu.
- Polítiques actives que garanticen el relevu xeneracional nes explotaciones agropecuaries.
- Garantíes de sirvicios públicos de calidá nel mediu rural: enseñu, sanidá, tresportes públicos, caltenimientu les carreteres, coneutividá dixital…
Éstes y otres asemeyaes son vindicaciones que nun deberíen facese yá nestos tiempos, porque la xente del campu asturianu bien merez que les sos necesidaes tuvieren atendíes dende cuantayá, más entá cuandu hai quien bixordea de qu’Asturies y l’Estáu español tienen gobiernos “progresistes”. Sicasí, lo que se percibe ye que los gobiernos entamaos por partíos españoles desdexen unos seutores productivos y reconvierten otros, esfarrapando dafechu la cadarma productiva d’Asturies, ensin más planes alternativos que paru, emigración forciá, xubilaciones y aídes sociales.
La política del PSOE, dende Madrid y dende Uviéu, xenera precariedá nel campu y en toa Asturies. Pero, énte estes polítiques neolliberales, perafitamos qu’Asturies ye un país ricu y tien futuru si consiguimos dirixir dende Asturies la ruta política y social que se tien de siguir pa garantizalu.
El campu asturianu tendrá futuru sólo si lu pue decidir, entós sí, entós podrá siguir siendo un seutor básicu y el nuesu modelu tradicional de vida continuaría siendo una opción valible.
Desiximos que’l Gobiernu d’Asturies entame na Xunta Xeneral un alderique específicu sobro la situación de l’agricultura y ganadería’l país y que presente ellí un plan estratéxicu pluriañal del seutor, nel que recueya les vindicaciones poles que ganaeres y agricultores se ven na necesidá d’ocupar les cais d’Uviéu.
Andecha Astur convita a les ganaeres/os y a les/os agricultores d’Asturies a participar nesta movilización y, sobro too, a qu’esta presencia na casi seya l’entamu d’una dinámica, caltenía nel tiempu, de reflexón conxunta y llucha solidaria del seutor. Porque tamos convencíos de que’l futuru d’Asturies pasa necesariamente por caltener dinamente’l seutor agroganaeru.
