Na XXXVII edición de los Premios Andrés Solar Andecha Astur propón de nueu a García Arias pal premiu Pegollum, y pide la recuperanza del premiu «Madreña Purpurina» pa que se-y otorgue a Adrián Barbón.
«Estimaos collacios y collacies de la Xunta pola Defensa de la Llingua Asturiana:
Persabemos que, otru añu más y son yá 37, convocáis los Premios Andrés Solar, colos que facéis por algamar la oficialidá de la llingua d’Asturies y caltener viva la memoria d’aquel collaciu y gran poeta asturianu al que-y pruyía “un pueblu llibre y una Asturies dixebrá”.
Comu entá nun finó’l plazu nel qu’almitís cantidatures, queremos facevos llegar la nuesa propuesta pal premiu d’esti añu.
Andecha Astur propón comu cantidatu al Pegollu na XXXVII convocatoria de los Premios Andrés Solar a don Xosé Lluis García Arias. Ente xente asturiano nun fai falta señalar los méritos indiscutibles que convierten a García Arias nesa presona a la qu’Asturies tanto-y debe; abasta señalar la so condición de reconocíu filólogu y profesor, autor d’obres fondamentales na normalización de la nuesa llingua, fundaor y primer presidente de Conceyu Bable y presidente de l’Academia de la Llingua Asturiana dende’l so entamu en 1981 fasta 2001.
Per otru llau, siempres sintiremos señaldá del otru premiu, el de la Madreña de purpurina, porque tando destináu a denunciar el llabor de daquién escontra los drechos llingüísticos de los asturianos, venía perbién pa señalar a don Adrián Barbón Rodríguez, secretariu xeneral de la FSA-PSOE y presidente del Gobiernu d’Asturies, qu’un añu más enrieda cola oficialidá ensin concedela y ta dimpuestu a hipotecar los nuesos drechos llingüísticos a mayoríes falsamente democrátiques de tres quintos de la Xunta Xeneral, a ñegamos que seya llingua vehicular nel enseñu y a ñegamos que seya de necesaria conocencia na fonción pública, dando continuidá asina a los más de 40 años de represión llingüística protagonizá por gobiernos del PSOE n’Asturies.
Deseyamos podáis considerar les razones de pesu que sofiten la candidatura que presentamos al Premiu Pegollu, al tiempu que vos animamos a recuperar el tradicional Premiu Madreña de purpurina.»
