Andecha Astur refuga una reforma llaboral fecha a midía de los intereses de la patronal y qu’afita la estatalización de la negociación colleutiva en perxuiciu de les naciones del Estáu.
Una vuelta más, el “gobiernu más progresista” del Estáu español (PSOE-Podemos-IU) torna a incumplir les promeses feches a la ciudadanía, y non solo nun deroga la reforma llaboral esistente, sinon que cenciellamente fai una riestra modificaciones a la midía de los intereses de la patronal y los mandatos de Bruseles, como dexa pernidio’l fechu de qu’ensiquiera nun modifique la normativa afitada pa la reforma llaboral de 2012 en materia de despidos, utilizada pola patronal pa despidir a les y los trabayaores de forma unillateral y ensin denguna garantía nin defensa, colo qu’esta reforma perpetúa la precarización del mercáu llaboral.
Per otru llau, esta reforma llaboral tampocu nun corrixe la estatalización de la negociación colleutiva impuesta poles reformes llaborales de 2010 y 2012, colo que los convenios seutoriales algamaos nel nuesu país siguirán tando subordinaos a los convenios estatales, un marcu de negociación munchu menos combativu y qu’atenta escontra’l drechu del pueblu asturianu a que seya Asturies el marcu de rellaciones llaborales propiu y soberanu.
A la fin, PSOE-Podemos-IU tornaron engañar a los sos votantes, demostrándose indignos de la clas a la que dicen representar y dexen nidio que l’únicu camín pasa por un cambiu de modelu xurídicu-políticu encontiáu nel drechu a decidir de los pueblos, pa que seyamos los pueblos los que decidamos llibre y democráticamente’l nuesu modelu socio-económicu y por supuestu, el nuesu futuru.
