Na postrer vidiu conferencia de la Conseyera d’Educación colos centros escolares, ésta decidió apaga-yos los micros pa nun tener que sentir les sos protestes
El presidente Adrián Barbón tien Twitter inundáu de mensaxes bixordeando de la calidá del sistema de salú pública que xestiona. Sicasí, la rialidá ye otra y toles asturianes y asturianos lo saben en cuantes tienen que pidir asistencia pa un problema de salú. Barbón cree qu’un twit pue facemos escaecer lo que mos pasa nos Centros de Salú, lo que mos pasa coles especialidaes méliques, coles llistes d’espera o… col andanciu del COVID19.
L’andanciu pilló a Asturies na pior de les situaciones: décades nes que’l PSOE gobernó Asturies recortando presupuestos sanitarios, derivando pacientes a empreses sanitaries privaes y recortando les plantíes de trabayaores na sanidá público, echando fora d’Asturies a munchos d’ellos.
Comu consecuencia d’esa política neolliberal del PSOE, l’andanciu dexó a Barbón na pior de les situaciones posibles pa un presidente: superáu dafechamente poles necesidaes sanitaries básiques de la población y pola insuficiencia de la rede de sanidá pública pa prestar a toos un sirviciu de calidá.
Llegaos a esta situación, Barbón tomó estos díes un determín impresentable, vergoñosu, inxustu y que xenera riesgos pa la población asturiana: cargar responsabilidaes sanitaries sobro los equipos direutivos de los centros públicos d’enseñancia.
Increyible, pero cierto. Lydia Espina, Conseyera d’Educación, convocó una videuconferencia direutores pa presenta-yos les caberes modificaciones de los protocolos escolares antiCOVID. Comu Barbón tien colapsáu’l sistema sanitariu, agora carguen so los costazos de los equipos direutivos fonciones y decisiones que correspuenden a presonal sanitariu.
Les protestes de los direutores nun se fexeron esperar y munchos falaron claro na mesma videuconferencia. Durante pocu tiempu, eso sí. Porque, en cuantes Lydia Espina escuchó que los direutores s’espresaben con llibertá escontra la xestión que’l PSOE ta faciendo de la cris sanitaria nel ámbetu educativu, tomó un gran determín. Por primer vegá, el PSOE (Lydia) decidió apagar los micrófonos de los direutores y apagólos, dexándolos mudos nel restu la videuconferencia y consiguiendo que munchos d’ellos prefirieren desconeutar la comunicación, enantes que siguir viéndose sometíos a esta amuesa de despotismu.
El PSOE ye asina. Presume de que too va bien. Si pue y fae falta compra opiniones favoratibles mediante rellaciones clientelares. Y si nun consigue que prime’l so discursu d’autopublicidá, entós gueta la manera de tapar la boca a los discrepantes. El PSOE siempres foi demócrata d’esti tipu, al estilu la democrácia orgánica de Franco.
Lydia, torna la voz a les escueles. O dimite, que tú fuisti direutora fasta antayeri y sabes perbién lo que ye esto.
