Señala a Barbón comu un sirvior de los intereses del Gobiernu madrilanu y los lobbys enerxéticos
El Gobiernu madrilanu PSOE-Podemos-IU aprebó un Rial Decretu con midíes p’amenorgar el preciu la lletricidá que paga’l consumior final. Andecha Astur fae una valoración ñegativa d’esta iniciativa gubernamental, porque ye dañible pa la ciudadanía y tamién p’Asturies. Darréu xustificamos la nuesa postura.
- Ye falso que’l consumior, gracies a esti Rial Decretu, vaiga pagar la lletricidá al preciu de 2018, trátase sólo de publicidá gubernamental.
- Ye falso que les principales variables que determinen el preciu la lletricidá ta fora’l control de los gobiernos y de la Xunión Europea.
- Les midíes aprebaes pol Gobiernu español son insuficientes porque, anque quieren foncionar comu midíes paliatives, nun eviten que la ciudadanía siga tando obligao a gastar más dineru nun consumu básicu d’enerxía.
- El pretendíu recorte de los beneficios estraordinarios algamaos poles llétriques ye dalgo insuficiente y ta condicionáu a munchos fautores; trátase sólo d’una puesta n’escena pa facer creyer que nun ye namái la ciudadanía la gran perxudicá por esta cris.
- La quita d’impuestos a la enerxía amenorga los precios de consumu, pero tamién los presupuestos colos que caltener los sirvicios públicos de calidá que la ciudadanía merez y necesita.
- El Gobiernu madrilanu PSOE-Podemos-IU ye’l preséu col que’l sistema caltién los sos intereses neolliberales, poro ñégase dafechu a la única solución rial: intervenir el seutor llétricu y entamar empreses públiques d’enerxía.
- Facilitar el bonu social llétricu a 600.000 families más supón estender la política de caridá pública, non la de xusticia social. Los bonos nun modifiquen el sistema d’estraición de rentes populares nin los descomanaos beneficios empresariales que permite esti sistema capitalista.
- Señalamos la responsabilidá que nesta cris n’Asturies tien el Gobiernu de Barbón y la FSA-PSOE, porque aceutó pasivamente la imposición de la descarbonización n’Asturies, ensin nin siquier dexisir nel so momentu les compensaciones riales que podíen paliar los efeutos de la nuea política de la Xunión Europea y los sos lobbys enerxéticos.
- Un exemplu ye cómu`l Gobiernu asturianu pertimitió qu’Iberdrola pesllare la térmica de Lada ufriendo comu supuesta compensación a Asturies enllenar los montes de molinos eólicos, con cuatru parques más, dalgo qu’económicamente nun ye comparatible y qu’amás xenera un gran dañu ambiental.
- El Gobiernu asturianu ta dexando que dellos grupos de presión espardan el mensax de que’l sosuelu asturianu tien gas p’abastecer una década’l consumu de tol Estáu español, aplicando, eso sí, la téunica’l fracking, que prevoca daños ambientales.
- El Gobiernu asturianu tampocu nun dixo un res cuandu la Xunión Europea, cediendo a los lobbys del seutor, almitió la enerxía nuclear comu verdi.
- Per otru llau Asturies ye un país que tradicionalmente vieno produciendo siempres más enerxía de la que consume, tienéndola l’Estáu español talamente comu si fora una “granxa llétrica” de la so propiedá.
Poro, Andecha Astur desixe al Gobiernu de Barbón que dexe de sirvir silenciosamente a los intereses de los lobbys enerxéticos y d’obedecer sistemáticamente al Gobiernu madrilanu.
Barbón tien la obligación política de defender los intereses d’Asturies. Y eso pasa por torgar que seyan les grandes empreses les qu’igüen y desigüen la política enerxético n’Asturies, el mercáu enerxéticu, los precios y les esportaciones.
Barbón tien la obligación d’abrir un alderique públicu sobro la custión, un procesu participativu y popular que, partiendo de la produción enerxética del país asturianu y les sos necesidaes de consumu, fine cola ellaboración d’un Plan Enerxéticu Estratéxicu p’Asturies.
