Andecha Astur llama a movilizase pola Oficialidá

Hai que denunciar el fraude políticu de quien mos vendieron pa yá una Oficialidá que nun va ser aína

Andecha Astur llama a participar nel manifestamientu convocáu pa esti sábado 7 de mayu, pa desixir una vegada más la Oficialidá de la nuesa llingua nacional, y quier que con ella se denuncie con más fuercia que nunca’l fraude políticu de quien prometieron la Oficialidá pa yá, y non solo nun fixeron ná pa ello, sinón que punxeron tolos pilancos posibles pa torgala.

Agora mesmo, cuando la oficialidá de la llingua d’Asturies yá ye una vindicación asumía socialmente a la que namás s’opón públicamente quien defende postures antidemocrátiques, queda n’evidencia la falta de voluntá política d’Adrián Barbón, que nun pasó de les promeses y el posturéu, y en conxuntu de PSOE-IU-Podemos y Foro qu’escenificaron desalcuentros pa xustificar, nuna oportunidá única y difícilmente repetible, nun avanzar na reconocencia oficial de los drechos llingüísticos del pueblu asturianu.

Ye más, non solo mos torgaron otra vuelta la oficialidá, sinón que PSOE-IU-Podemos y Foro  tampoco nun quinxeron avanzar na reconocencia llegal de los drechos llingüísticos de los asturianos/es, de tala miente que nin desendolcaron les posibilidaes de la nefanda “Ley de Protección del bable/asturiano”, nin aprebaron dimposiciones al efeutu na llexislación asturiana, nin siquier a nivel de conceyu.

Ello asina, Andecha Astur considera que ye preciso una rempuesta social al so fraude políticu, por más que ye cosciente de la esistencia de della desmoralización por parte de quien creyó en plantegamientos trunfalistes –la “postrer” manifestación pola oficialidá foi tovía hai unos meses-, y estratexes polítiques incomprensibles y finalmente fracasaes, como ye’l casu de la propia Academia de la Llingua Asturiana que llegó a pidir el votu pa los que “diben trayemos la Oficialidá” y cuyu combayéu con Adrián Barbón dio los resultaos conocíos.

Precisamente por ello la movilización social ye la rempuesta frente a la militancia antiasturiana de los partíos españoles n’Asturies.

Oficialidá ya!!