El “Gobiernu más progresista de los Borbones” refugó toles iniciatives d’Andecha Astur pa caltener l’emplegu y los drechos llaborales nesta empresa y pa defender la prioridá de los intereses públicos
Apocayá Andecha Astur presentaba, al traviés del portavoz d’EH Bildu nel Congresu los Diputaos, Oskar Matute, unes entrugues sobro les intenciones del Gobiernu español na proteición de los trabayaores d’ArcelorMittal.
Agora, ensin nengún pudor, el Gobiernu PSOE-Podemos-IU, supuestamente progresista, acaba d’esclariar que nun camienta tomar nenguna midía de proteición de los trabayaores nin de defensa de los intereses públicos.
El Gobiernu español renuncia a tomar iniciatives, comu-y pidía Andecha Astur, pa garantizar los puestos de trabayu n’Arcelor Mittal, que menacia con reestructurar la empresa, recortar la produción y desaniciar más de mil emplegos. El Gobiernu español tampocu nun va facer un res pa consiguir otra de les desixencies d’Andecha Astur: que la plantilla d’ArcelorMittal disponga yá del conveniu llaboral al que tienen drechu y que la empresa retarda too siguío.
Al empar, el Gobiernu español refuga otra propuesta que-y treslladó Andecha Astur: la posibilidá de determinar la entrá de l’Alministración Pública nel aicionariáu d’ArcelorMittal, comu xusta compensación a los miles de millones d’aídes públiques que recibe esta multinacional.
Esto ye, el que se publicitó comu’l Gobiernu más progresista de los Borbones acaba demostrar que PSOE, Podemos ya IU sólo tán nel poder pa siguir xestionando los mecanismos d’esplotación afitaos pol sistema capitalista, y qu’arrenuncien espresamente a emplegar los preseos posibles que valdríen pa defender los intereses de la clas trabayaora y de les propies Alministraciones Públiques. Al mesmu tiempu, PSOE, Podemos ya IU preséntense, una vegá más, comu partíos españoles dafechamente ayenos a los intereses d’Asturies y de los sos trabayaores.
Andecha Astur considera necesario que toa Asturies saque conclusiones polítiques d’estos fechos y que les tresllade a les prósimes elleiciones, facilitando’l cambiu políticu radical que necesita Asturies: un gobiernu propiu que la defenda de verdá y una presencia en Madrid que garantice que les asturianes y asturianos tienen voz propia énte’l Gobiernu español.
Per otru llau, Andecha Astur confirma’l valir de la so coalición “Agora Repúbliques” (con EH Bildu, Esquerra Republicana y otres fuercies nacionaliegues del Estáu) y sigue ufriendo a les y los trabayaores d’empreses en cris la posibilidá de desixir soluciones al Estáu español y de facer más visible la so llucha.
