Andecha Astur entama un alcuentru entre trabayaores asturianos d’empreses en cris y los diputaos d’EH-Bildu y ERC

Andecha Astur acompaña a Madrid a representantes del sindicatu Corriente Sindical d’Izquierda y de les empreses en cris, p’axuntase’l 23 de xunu colos diputaos de la so coallición “Agora Repúbliques”, Óskar Matute (EH Bildu) y Gabriel Rufián (Esquerra Republicana de Catalunya).

Trabayaores d’ALSA, Delcom, Duro Felguera, Limpac, Vayven, Modultec, Danne, Vauste, Just Eat, Glovo, Llacera, Trefilería Moreda, Konecta y EBHISA, en representación de toles empreses en cris que lluchen en Asturies polos drechos llaborales, van tener la oportunidá d’apurrir nel Congresu de los Diputaos un informe sobro la situación d’estes empreses y les reivindicaciones que defenden les sos plantiyes.

Coles mesmes, nesti viaxe xestionáu por Andecha Astur, esta organización va apurrir a los diputaos de la so coallición una batería d’entrugues pa rializar al Gobiernu español, conformáu por PSOE y Unidas Podemos, sobro la responsabilidá d’esti Gobiernu na nueva desindustrialización d’Asturies, sobro les sos alternatives y sobro la pasividá cómpliz que caltien el Gobiernu d’Adrián Barbón.

Y ye qu’analizar la situación asturiana resulta especialmente doliosu, cuidao que ye un procesu continuu de perda de condiciones sociales, económiques, llaborales, medioambientales, culturales, identitarias… que paez nun tener fin.

La desindustrialización planificada que xenera una sistemática destrucción del texíu socioeconómico asturianu, la sobroesplotación ambiental que remanez del despreciu al mediu ambiente, la represión llingüística, la aculturización, la destruición del padremuñu cultural y ecolóxicu… too ello marca una ablucante realidá que se desendolca dientru d’un marcu de falta de llibertaes democrátiques y de desdexación de funciones, cuando non de collaboracionismu servil y sucursalista de les instituciones y los políticos asturianos.

Dientru de too ello, y de resultes principal de la desindustrialización y destruición del nuesu texíu sociu-económicu, hai que destacar cómo se foi desendolcando un procesu planiáu de precarización llaboral, paru, y emigración forciada de la mocedá asturiana, que traen como corolariu la cayía de la natalidá a niveles únicos a nivel mundial y, de resultes d’ello, la perda de dinamismu y la desestructuración social, de forma que non solo afeuta a la calidá de vida de los asturianos/as, sinón que pon en pelligru la mesma supervivencia del pueblu asturianu como talu.

Éstes son les razones que motivaron a Andecha Astur pa facilitar el contautu directu ente el trabayadores asturianos d’empreses en cris y los grupos políticos que nel Congresu de los Diputaos defenden polítiques de verdadera izquierda, alternatives al neolliberalismu gubernamental.