L’ actu de comemoración de la Declaración d’Independencia del Conseyu Soberanu d’Asturies y Llión afondó na necesidá de tresnar un frente ampliu, asturianu y d’izquierda
L’ascensu a les trincheres de L’Abidular y la visita a les casamates defensives de Tarna –pa les qu’Andecha Astur vien de proponer un conveniu astur-llionés pa caltener y poner en valor- finó con un homenaxe florar y la intervención política de Mariano Suárez.
La Declaración de Soberanía del Conseyu Soberanu d’Asturies y Llión foi l’ellementu conductor d’una intervención política na que se reclamó la pervivencia del Conseyu Soberanu como la istitución política asturiana propia, frente a un ‘Principado’ y un estaturu autonómicos impuestos dende Madrid, que fixeron suyu l’oxetivu franquista d’esaniciar el Conseyu Soberanu y con elli, la soberanía del Pueblu Asturianu pa decidir llibremente’l so futuru.
Asina mesmo, y siguiendo l’exemplu de lo que foi l’aniciu d’esti Conseyu Soberanu, Mariano Suárez defendió na so intervención, la urxencia d’aniciar un Frente Asturianu d’Izquierda de base amplia nel que puedan participar presones y organizaciones dende la so propia soberanía ya identidá, pero articulaes de tala miente que’ufra a la sociedá asturiana una alternativa viable, una ferramienta de progresu y tresformación social.
Nesi sen, plantegó como principios básicos d’esi Frente Asturianu d’izquierda:
- La necesidá de responder a les polítiques neolliberales que ponen la economía alser viciu de los itnereses d’una minoría en perxuiciu del conxuntu la sociedña
- La necesidá de defender los llexítimos drechos ya intereses de los asturianos/es con una Soberanía dafechu
Ello ye, un frente 100% asturianu nel que tean cabida posiciones asturianistes, nacionalistes, soberanistes, independentistes… y con un claru compromisu social. Una izquierda amplia, democrática y participativa.
