Mañana, 12 d’ochobre, Andecha Astur va homenaxear a los revolucionarios d’ochobre del 34 na figura de Belarmino Tomás y de los Mártires de Carbayín, vindicándolos como referenciales pal futuru d’Asturies
Como davezu, coincidiendo cola cellebración españolisa del ‘Díi de la Hispanidá’, Andecha Astur cellebrará dos actos d’homenaxe a la Revolución d’Ochobre’l 34, a les 12:30 hores nel cimenteriu Carbayín, onde ta la tumba de los 24 asturianos asesinaos pol exércitu de la República Española na represión que siguió l’aplastamientu de la revolución asturiana, y per otru a les 13:30 hores nel cimenteru pandu, onde s’afaya la tumba de Belarmino Tomás, , presidente del Conseyu Soberanu y ún de los principales protagonistes de la revolución d’ochobre del 34.
L’homenaxe a la República Obrera y Campesina d’Asturies declarada n’ochobre del 34 frente a la República Española, supunxo qu’ésta, incapaz de respetar el Drechu a Decidir del Pueblu Asturianu, procediere a invadir militarmente’l nuesu país, protagonizando una represión sangrina.
Güei, como entós, la necesidá d’una República Asturiana ye un referente de renovada actualidá, darréu que namás l’exerciciu del drechu a la Soberanía pue superase la situación de represión de los drechos nacionales y sociales del pueblu asturianu, y el procesu d’esfarrapamientu esaniciu, paru, precariedá, emigración forciada de la mocedá y asimilación colonialista que l’Estáu español tien entamáu p’Asturies.
Amás, esti añu tornaráse a llantar les plaques n’alcordanza del Presidente Belarmino Tomás, en sustitución de les esistentes dende hai más de 20 años, y que vienen de ser oxetu d’un actu vandálicu del facismu español, dolíu pola reclamación y vixencia que fai Andecha Astur d’unos fechos hestóricos referenciales pal futuru del nuesu país.
Per otu llau, la fecha del 12 d’ochobre resulta especialmente interesante, tanto por asitiase metanes del periodu revolucionariu asturianu, como pola sinificación españolista d’esa xornada, na que l’Estáu español cellebra una “Hispanidá” que nun ye más que una xornada d’esaltación del so patrioterismu colonialista.
MIÉRCOLES 12 D’OCHOBRE
12:30 Homenaxe a los Martires de Carbayín. Cimenteriu San Xuan. Carbayín – Siero
13:30 Homenaxe a Belarmino Tomás. Cimenteriu Pando – Llangréu
