Andecha Astur presenta una riestra entrugues al Conseyeru Salú del ‘Principado’ al rodiu de la situación sanitario nel hospital mierénse
Concretamente les entrúgues céntrense na llista d’espera pa operaciones de cáncanu d’úteru nel Hospital Vital Álvarez Buylla (Mieres) que según fontes sanitaries, supera’l plazu d’un añu d’espera, dando lo mesmo que la paciente s’atope na fase 2 que na fase 3 d’esta enfermedá mortal.
Énte esta rialidá, Andecha Astur vien de presentar les entrugues que vienen darréu:
- ¿Dende qué fecha’l tiempu d’espera pa operase de cáncanu d’úteru nel Hospital Vital Álvarez Buylla superó los dolce meses d’espera?
- ¿Cuálos son los tiempos d’espera pa operase de cáncanu d’úteru nel restu los hospitales publicos d’Asturies?
- ¿Considera o non el señor Conseyeru qu’esta rialidá representa una situación d’emerxencia sanitaria que daña gravemente’l drechu les ciudadanes a una atención sanitaria de calidá y pon en pelligru’l so drechu a la vida?
- ¿Qué midíes tomó la Conseyería fasta agora pa iguar esta situación d’emerxencia sanitaria?
- En viendo que, si les hubo, les midíes tomaes nun consiguieron iguar la situación, ¿qué midíes camienta tomar la Conseyería pa dar acabu a esta emerxencia sanitaria?
- ¿Abúlta-y ético al señor Conseyeru que, por exemplu, mentantu la sanidá pública obliga a les muyeres asturianes a esperar más d’un añu pa operase de cáncanu d’úteru, el xefe de la Unidá de Xinecología del Hospital Vital Álvarez Buylla opere éstes y otres patoloxíes nel ámbetu la melecina privao?
- A la vista d’estos datos ¿nun creye’l señor Conseyeru que la so política sanitaria del Gobiernu supunxo l’entamu de dos niveles d’atención: ún na sanidá pública pa muyeres ensin recursos económicos y otru na sanidá privao pa muyeres que sí los tienen?
La situación de la Sanidá Pública Asturiana, en plenu procesu d’escalada, a la que ta dexándose ensin recursos humanos y materiales, ta prevocando una situación sanitario que se paga en sufrimientu y vides humanes, y qu’a la fin nun persigue otru oxetu que la progresiba privatización de la sanidá público a base de desdexala y obligar a la xente enfermo a recurrir a la sanidá privao.
