Estos díes desendólcase na Audiencia nacional española’l macroxuiciu poles obres d’ampliación del puertu El Musel. 250 millones € de sobrocostu falsiáu, 21 acusaos de fraude, prevaricación y otros delitos… El mayor casu de corrución protagonizáu pol PSOE n’Asturies, magar los munchos casos nos que ta implicáu.
Pero tamos falando d’unes obres qu’entamaron en 2005 y finaron en 2010. Trátase d’un fechu asocedíu ente 13 y 18 años atrás. Ye dalgo que quiciás yá nun ta na memoria de quienes naquel tiempu siguíen l’actualidá. Y, por supuesto, ye dalgo que la mocedá asturiano nun conoció direutamente y que’l sistema torgó que conocieren a fondu.
Poro, Andecha Astur pon a disposición público un pequeñu informe que resume tola información refería al conocíu comu “Casu El Muselón”, que se pue descargar equí mesmo.
Del conteníu l’informe hai un datu que tapecen cuasi siempres los medios de comunicación de la casta. Andecha Astur foi la organización que denunció esti grave casu de fraude y corrución, cuandu en 2009, de la man de la so coallición Europa de los Pueblos, presentó una denuncia formal énte la Oficina Europea de Llucha Escontra’l Fraude (OLAF).
Lo que taba pasando n’El Musel, cómu se tiraba fierro a la mar, cómu camiones qu’entraben con mercancía salíen de vuelta figurando comu entregao, cómu nun había causes pa un sobrocostu tan brutal comu 250 millones €…, too ello yera vox populi. Sicasí, los partíos políticos y les estayes sociales organizaes comu casta, prefirieron ser cómplices silenciosos de lo que taben faciendo Areces y el PSOE. Sólo Andecha Astur tuvo’l compromisu y el valor de denunciar los fechos énte la OLAF.
Ello foi asina porque, mentantu al PSOE sólo-y interesaba robar dineru n’El Musel pa poder siguir engrasando les costoses redes clientelares coles qu’amarra’l llibre foncionamientu la sociedá, Andecha Astur tenía sólo la prioridá de defender los intereses del Pueblu Asturianu y finar cola corrución.
Cincu años dempués, en 2014, la OLAF espublizaba’l so informe final, reconociendo nes sos páxines que se trata d’una obra inecesaria y onde les autoridaes y les empreses amagostaron un falsu sobrocostu de 250 millones € pa repartíselos.
La megalomanía d’Areces y el réxime mafiosu de la FSA-PSOE sólo tuvo entós el frenu qu’Andecha Astur consiguió na Xunión Europea. Y eso, que se suel “escaecer” tien de sabese, igual qu’Asturies nun pue escaecer qu’esistió y en qué consistió’l “Casu El Muselón”.
Y pa esto esti informe que vos brindamos.
¡Porque otra Asturies ye posible!
One thought on “Casu El Muselón: Un macroxuiciu gracies a la denuncia d’Andecha Astur n’Europa”