Considera inxustificable que mintiera nel casu los trenes de FEVE, y por desdexar nes manes del Estáu la política Ferroviaria Asturiana
Renfe axudicó en 2020 un contratu de 258 millones € pa que la empresa Construcciones y Auxiliar de Ferrocarriles (CAF) fabricare 31 trenes pal sirviciu de FEVE n’Asturies y Cantabria. Y agora súpose que los trenes son endemasiao grandes pa los túneles pelos que tienen d’andar. Comu consecuencia, Asturies entardará polo menos 3 años más en tener los trenes que necesita.
Barbón permitió fasta que se riere d’elli’l Secretariu Xeneral d’Infracadarmes del Gobiernu español, Xavier Flores, cuandu dixo que’l problema ye que los túneles asturianos “son más pequeños que lo avezao”. Cuandu la clave del conflictu reside’n que los trenes que fabricaron son más grandes de lo necesario.
Ente esti disparate, al presidente Barbón sólo se-y escurre esculpiase cellebrando un Domingu de Sidros y Comedies en Bimenes, diciendo que “sabía qu’había un retrasu colos trenes, pero nun me desplicaron el motivu rial”. Los intereses políticos que comparte y la rellación fluyía que tien col Gobiernu español faen increyible esta esculpia, una mentira a la que Barbón recurre pa intentar salvar el so prestixu nun tiempu preelleutoral. El presidente, nuna actitú de sumisión que los asturianos nun merecen, nin siquier tuvo la dinidá de desixir responsabilidaes polítiques y ceses polo asocedío, dalgo que sí fizo polo menos el presidente de la comunidá ecina. A la vista d’ello, lo meyor que podía facer el presidente ye dimitir. Por mentir y por nun defender los intereses d’Asturies.
Pero tamién pidimos la so dimisión porque ye responsable indireutu de lo asocedío: porque Barbón y la FSA-PSOE lleven décades ñegándose a qu’Asturies asuma plenes competencies en materia ferroviaria. L’Estatutu d’Autonomía otorgáu a Asturies, magar lo ruinu que ye, permite que tengamos plenes competencies en nesta materia. Sicasí, les caberes competencies asumíes por Asturies daten de 2006, les de Xusticia, y dende entós Barbón y el so Gobiernu ñegáronse públicamente abondes vegaes a entamar negociaciones col Estáu español p’asumir competencies en materia ferrocarriles. Siempres lo xustifiquen demostrando, ensin querer, que se reconocen malos negociaores y xestores, porque Barbón y los suyos argumenten que l’asunción d’eses competencies sedría una llocura, dalgo inviable porque estrozaría la “autonomía asturiana”.
En rialidá, Barbón y la FSA-PSOE tienen mieu a que l’Estáu-yos tresparare’l ferrocarril na situación d’estremu abandonu’n que ta anguañu y con una tresfrerencia fondos insuficiente pal so caltenimientu; tienen mieu a que l’Estáu-yos gane la partía tresfiriendo a Asturies non unes competencies, sinón un pufu hestóricu que xorreció debío a la complicidá y, sobro todo, a la obediencia de los sucesivos gobiernos asturianos.
Asturies tampocu nun merez un presidente sumisu a intereses ayenos, que tenga llercia a desixir un sirviciu ferroviariu de calidá, a tener más competencies y a negociales con posu y dinidá col Estáu español.
