Un documentu d’Andecha Astur centráu nes soluciones al desequillibriu territorial d’Asturies
Andecha Astur fae públicu’l documentu “60 propuestes de política xeneral y compensatoria pa l’Asturies periférica”. Ye’l resultáu d’un grupu de trabayu formáu por ciudadanos independientes y por militantes n’Andecha Astur.
L’oxetivu ye doble. Per un llau denunciar que les polítiques de los gobiernos asturianos nes caberes décades dañaron el necesariu criteriu d’equillibriu territorial del nuesu país. Curiosamente los partíos responsables yeren d’ámbetu estatal, con intereses ayenos a los d’Asturies. Esta disfunción na xestión pública xeneró una situación llamentable ya inxusta: Asturies tien güei una delda hestórica colos conceyos más alloñaos del so centru xeográficu, colos que pudiéremos nomar, con ciñu, territorios periféricos.
Per otru llau, el documentu demuestra que la situación d’Asturies tien igua, y la de los sos conceyos más estremaos tamién. Hai alternatives viables y xente con puxu pa llevales a cabu.
Tamos énte un trabayu centráu en dar soluciones, en señalar polítiques pal requillibriu que son tan necesaries comu posibles.
Énte la rialidá del desequillibriu prevocáu polos gobiernos asturianos, Barbón nun pue llimitase a iguar argayos o a intensificar la propaganda istitucional. Poro, acabamos de face-y llegar esti documentu al Presidente, col pidíu de que valore y asuma les midíes propuestes pa garantizar el meyor futuru del ocidente y l’oriente d’Asturies. Lo memo que tamos faciendo coles Cases Conceyu y con estremaos colleutivos sociales d’estos territorios, colos que tamos compartiendo’l documentu.
Porque ye un testu abiertu. Abiertu a la reflexón colleutiva, al descutiniu, a la meyora… Abiertu a que se sumen a él cuantos creyan na direición na que s’apunta y quieran bien a esta Asturies de la periferia que tanto necesitamos.
Énte la rialidá del desequillibriu territorial d’Asturies, nun facer ná o llimitase a la propaganda y les declaraciones vacíes, ye ñegar el futuru a una parte esencial d’Asturies, dar pasos axigantaos na destruición de la nuesa riqueza, identidá, padremuñu y modelu vida. Igual que sedría facilitar el proyeutu megalomaníacu del “Área Metropolitana Central”, precisamente’l que defenden los que quieren convertir Asturies nun gran parque temáticu al sirviciu del turismu esterior.
