Andecha Astur pide a la Casa Conceyu de Xixón informes diarios sobro la contaminación del aire y a la Conseyería d’Industria una investigación oficial del acidente
Acabante producise una grave esplosión nel Fornu Altu A d’ArcelorMittal, Andecha Astur allégrase de que se pudiere evacuar correchamente la istalación, evitando perdes de vides y, de momentu, paez ser que tamién daños presonales ente los trabayaores.
La situación esmoleceora que xenera esti socedíu, lleva a Andecha Astur a pidir a la Casa Conceyu de Xixón un control de la contaminación del aire rigurosu y tresparente, averando les males práutiques cometíes n’otros momentos nesta custión. La Casa Conseyu debería comparecer públicamente estos díes pa facilitar los datos recoyíos sobro contaminación del aire.
Igualmente pidimos, cuandu los niveles de gases y partícules lo faigan mester, qu’entaíne poner en marcha los niveles d’activación regulaos polos protocolos de contaminación del aire. Finalmente, creyemos que la Casa Conseyu debería poner en marcha un Foru Ciudadanu, nel que, cola participación d’asociaciones vecinales, partíos políticos y organizaciones ciudadanes, s’estudie la situación de Xixón en materia de calidá del aire y se valoren midíes pa dexar de ser una de les ciudades más contaminaes d’Europa.
Nesta situación ye mester que’l Serviciu d’Emerxencies d’Asturies faiga un control estrictu de la calidá del aire, en previsión de posibles apaiciones de ñubes tósiques, de manera que se puea avisar a la población asturiana y poner en marcha los protocolos afayaízos.
Andecha Astur pide a la Conseyería d’Industria, Emplegu y Promoción Económica que proceda abrir una investigación oficial sol acidente asocedíu nel Fornu Altu A d’ArcelorMittal y que, una vegá pesllá, se comuniquen los resultaos a la Xunta Xeneral y a la ciudadanía de Xixón.
Pero otru llau, tamién creyemos que la Conseyería d’Industria tien de pidir a la direición d’ArcelorMittal comunicación sobro si esti acidente va afeutar, y en qué midía, a los planes de sustitición del Altu Fornu A y al emplegu la plantía.
