Antón Fuertes Rodríguez ye Doutor en Socioloxía Política pola Universidá Compluense de Madrid, cursó estudios d’Ecoloxía y Mediu Ambiente, dirixó’l Departamentu d’Estudios y Formación de la Confederación Xeneral de les Pequeñes y Medianes Empreses y ye miembru de l’Asociación Asturiana de Socioloxía «Adolfo G. Posada».
Antón Fuertes tuvo a bien compartir con nós la so valoración de les “60 propuestes de política xeneral y compensatoria pa l’Asturies periférica”, presentaes hai poco Andecha Astur.
Sobro esta iniciativa, Antón Fuertes cúntamos esto: “Dende la mio perspeutiva de ciudadanu orixinariu d’esti nuesu Ocidente asturianu, les ‘60 propuestes de política xeneral y compensatoria pa l’Asturies periférica’ son perfeutamente fautibles. Tán feches con xeitu, sofitaes na nuesa realidá.
Si Asturies ta desaniciada en distintos aspeutos, les ales tán a la solombra d’esta marxinación, nel Ocidente entovía pior. Dellos conceyos (Cangas, Tinéu…) tán ente los municipios cabezaleros del Estáu español en perda de población. Delles industries, minería, enerxía, dexaron de furrular ensin alternatives series. El seutor agrariu, enllenu de posibilidaes, tamién ta amenorgáu. Pa la Mariña, dalgunos seutores (naval, centrales lláctees, papeleres, dalgunes conserveres…) resisten meyor. Les infraestructures ehí tán, abandonaes: carreteres, redes tecnolóuxiques, rede educativa… Pa premiu, el Gobiernín diz amén a los proyeutos de parques eólicos, tanto nel territoriu del Ocidente comu nel llitoral, pa facer un reservoriu enerxéticu col que poder esportar enerxía a otros llugares alloñaos.
Ési ye’l plan, cuatru persones nel desiertu, que causen pocos problemes. Paraísu, Parques de la Natura, parques onde sople’l vientu, ensin xente, nun fai falta. Quiciabes ésti ye’l ‘Plan`: Naturaleces muertes pa estiala del Ocidente. Mui guapo pa facer semeyes...”
P’Andecha Astur estes 60 propuestes tienen una doble finalidá. En primer llugar, sirven pa señalar cómu foron les polítiques de los sucesivos gobiernos d’Asturies les que dañaron demientres décades el necesariu criteriu d’equillibriu territorial del nuesu país, daos los sos intereses ayenos a Asturies.
Asina ye que, arriendes d’esta política territorial sesgá, Asturies tien güei una delda hestórica colos sos territorios periféricos. Les compañeres y compañeros d’Andecha Astur trabayaron enforma na ellaboración d’estes propuestes, qu’espublicemos hai poco y de les que güei Antón Fuertes diz que tán feches con xeitu.
60 propuestes de política xeneral y compensatoria pa l’Asturies periférica
