Con participación de pescaores, ecoloxistes y compañeros d’Andecha Astur
31 marzu – 19:00 hores / Conceyu la Mocedá – Xixón
¿Son necesarios los molinos eólicos na mar d’Asturies? ¿Decidiólo Bruseles, Madrid o Asturies? ¿Cuántos molinos eólicos quieren poner n’Asturies? ¿Cómu se llanta un molín eólicu na mar? ¿Túvose’n cuenta la opinión de los pescaores y de los defensores del mediuambiente? ¿Fízose más casu a los científicos o a los oligopolios de la enerxía? ¿Un parque eólicu dura tola vida? ¿Muévense munchos millones d’euros nesta industria? ¿Tien dalguna consecuencia ñegativa la enerxía de los vientos? ¿La eólica ye una enerxía llimpia o hai trames de corrución? ¿Ye normal un parque eólicu nuna zona marina protexía pola so importancia pa la biodiversidá? ¿Cuánto sabía Barbón de los parques eólicos marinos n’Asturies enantes de que salieren nel BOE? ¿Cuánto ganen les empreses eóliques? ¿Cuántos fondos públicos reciben estes corporaciones? ¿Cuántu hai de trayeutoria democrática y cuándu de guión empresarial nel camín haza la enerxía eólica? ¿Qué ye una moratoria eólica? ¿Ye bono p’Asturies aprebar una moratoria eólica?
Son posibles estes estrugues, tamién otres asemeyaes… Pero seguramente que milenta duldes pasen pel maxín de les asturianes y asturianos tres saber que’l Gobiernu “progresista” de Madrid (PSOE + Podemos + IU), al traviés del BOE, acutó llegalmente tres fasteres marítimes, nel nuesu Cantábricu, pa llantar parque eólicos marinos.
Les primeres reaciones al BOE de los eólicos marinos foron les de los pescaores y la d’Andecha Astur, que desixó públicamente una moratoria eólica n’Asturies. Pero tamién les organizaciones ecoloxistes tienen opiniones propies nesta custión.
Asina qu’ufrimos la posibilidá de conocer un poco más la rialidá de la enerxía eólica marina, los pros y los contras, les estremaes opiniones sol tema… nuna mesa-alderique pública que, col títulu “Enerxía eólica ¿tamién na mar?”, va facese esti vienres, 31 de marzu, a les 19 h., nel Salón d’Actos del Conseyu la Mocedá de Xixón.
La Direición Xeneral de Pesca del Gobiernu d’Asturies ta convitá a participar, anque entá nun hai confirmación de la so participación. Sí ye segura la presencia de María José Rico Fernández (Secretaria Xeneral de la Federación de Cofradíes de Pescaores d’Asturies), Eneko Aierbe (Ecoloxistes n’Aición), Fruti Pontigo (Cordinaora Ecoloxista d’Asturies) y Mariano Suárez (Andecha Astur). Va moderar la mesa Carme Pérez, d’Andecha Astur. La entrá al actu ye llibre fasta completar l’aforu.
Notes biográfiques participantes confirmaos nel alderique
María José Rico Fernández, ye la Secretaria Xeneral de la Federación de Cofrafíes de Pescaores d’Asturies dende 2006. Ye Diplomá’n Rellaciones Llaborales y miembru del Conseyu Consultivu de les Agües Surocidentales, nel que preside’l Grupu Trabayu de Peláxicos.
Eneko Aierbe, acompángamos comu representante d’Ecoloxistes n’Aición d’Asturies. Ye llicenciáu en Ciencies de la Mar pola Universidá de Vigo y Máster de Biodiversidá y Conservación Marina pola Universidá d’Uviéu. Trabaya comu téunicu d’investigación nel Istitutu Español d’Oceanografía.
Fruti Pontigo, ta equí comu representante de la Cordinaora Ecoloxista d’Asturies. Tamién ye voceru del Coleutivu Ecoloxista d’Avilés, del Conceyu escontra la Incineración y tamién del coleutivu Asturies por un Aire Sanu.
Mariano Suárez, participa na mesa comu miembru de la Xunta Executiva d’Andecha Astur. Ye mayestru xubiláu de la Enseñancia Pública y autor de delles obres de lliteratura infantil y d’hestoria d’Asturies.
