Andecha presenta al Presidente 4 midíes urxentes: comparecencia na Xunta Xeneral, comparecencia pública, mesa téunica (Guardería, BRIPAS y Bomberos) y compromisu pa una nuea Llei de Montes.
La llaceriosa rialidá de 95 incendios forestales, prevocaos la mayor parte, en 35 conceyos asturianos sólo se pue definir d’un mou: Barbón, Asturies Arde.
Ayeri la cuasi totalidá de les organizaciones ecoloxistes asturianes espublizaron un manifiestu conxuntu pidiendo la dimisión del Conseyeru de Mediu Rural, Alejandro Calvo, faciéndolu responsable d’una xestión llaceriosa del monte asturianu, causa principal pola qu’Asturies arde estos díes.
Andecha Astur asume dafechu’l conteníu del manifiestu ecoloxista y creyemos tamién qu’Alejandro Calvo nun pue siguir causando daños sociales, económicos y ecolóxicos dende la responsabilidá que-y encomendó Adrián Barbón.
Pero Andecha Astur quier aportar tamién llínies d’actuación que permitan atayar el grave problema de los incendios forestales prevocaos. Asina presentó-y al Presidente’l Gobiernu asturianu un conxuntu de cuatru midíes urxentes, que son:
- Comparecencia urxente del Presidente, Adrián Barbón, énte la Xunta Xeneral d’Asturies, pa desplicar la situación na que s’afayen los incendios, les midíes tomaes y los procedimientos que va poner en marcha pa investigar lo asocedío, guetar responsables y entamar reformes llegales que torguen situaciones comu la presente.
- Comparencencia urxente del Presidente, Adrián Barbón, nuna rueda de prensa, con drechu a entrugues por parte los profesionales de la información, comu fórmula pa desplicar a les asturianes y asturiano tanto lo asocedío, comu los compromisos qu’asume pa torgar nuees foles d’incendios masivos. Nesta comparecencia y na anterior el Presidente debería desplicar por qué nun había xixilancies programaes, por qué nun s’activaron darréu tolos Axentes del Mediu Ñatural, por qué nun se cubren les vacantes de les Brigaes d’Investigación d’Incencios Forestales (BRIPAS), por qué se da aliendu a los incendiarios desatendiendo la investigación de quemes anteriores, por qué ye mester llegar a la situación d’un gobiernu que tien de pidir a los Axentes del Mediu Ñatural que camuden voluntariamente de turnu p’atender los fueos, etc.
- Que’l Gobiernu asturianu convoque yá una mesa téunica de negociación cola Guardería del Mediu Ñatural, Brigaes d’Investigación d’Incendios Forestales (BRIPAS) y Bomberos d’Asturies, pa definir un Reglamentu téunicu sobro la prevención y xixilancia de los incendios, disposición y emplegu de recursos materiales y homanos, intervención nos incendios ya investigación de los mesmos.
- Que’l Gobiernu d’Asturies promueva una declaración istitucional de la Xunta Xeneral comprometiéndose los partíos que la componen a entamar la prósima llexisllatura con una Comisión d’Investigación sobro les foles d’incendios masivos n’Asturies y l’aprebación d’una nuea Llei de Montes, que determine procedimientos eficaces pa la llimpieza los montes, que redefina les llabores de prevención, xixilancia ya investigación d’incendios, y mecanismos alministrativos qu’aseguren la collaboración del Gobiernu asturianu na persecución del delitu d’incendiu forestal.
