Y entiende que’l proyeutu de Floro ye “más de lo mesmo” pa un Xixón que necesita un cambéu rial haza una política socialista, participativa y sofitá nos intereses de la ciudá
Estos díes l’alcaldesa cesante de Xixón, Ana González, declaróse partidaria de llantar n’El Muselón la tremenda planta de pirólisis que s’anunció. A mou d’esculpia dixo qu’ella sedría partidaria si la planta “cumple la llexisllación vixente”; esta esclariación nun ye del too improcedente, porque nun ye la primer vegá que’l PSOE defende n’Asturies istalaciones illegales.
Sicasí, l’alcaldesa anecia’n presentase comu la gran defensora de la planta pirólisis en Xixón cuandu ella nun ye vecina d’equí, cuandu yá ta finando los sos díes comu alcaldesa y cuandu una opinión pública mayoritaria refuga la presencia d’esa planta na ciudá. ¿Qué intereses ta defendiendo entós l’alcaldesa cesante? Los de Xixón, non.
Otru de los regalos envelenaos que dexa tres de sí Ana González, nesta ocasión cola aída d’Izquierda Unida, ye’l Plan de Movilidá Caltenible 2021-2030, aprebáu yá pela Xunta Gobiernu municipal. Curiósamente’l Plan va votase nel Plenu colos votos a favor del PSOE, mentantu Floro, el nueu candidatu a alcalde del PSOE diz que tán escontra’l conteníu del Plan y que lu camudarán. El Plan de Movilidá Caltenible ye otra importante pieza averiá que la ciudadanía refuga mayoritariamente, en bona parte porque se fexo a espaldes de la participación popular y nun soluciona bramente los problemes fundamentales de movilidá que carecemos en Xixón. Pero ehí ta Ana González, endolcándomos en papel un segundu regalu envelenáu.
Y comu tercer presente, l’alcaldesa que mos llegó de fora déxamos el Reglamentu de Llaicidá, una idega que vien siendo necesaria dende qu’entamó haber ayuntamientos supuestamente democráticos, pero a la que siempres se ñegó, fasta agora, la esquierda española. El Reglamentu que mos dexa’l PSOE d’Ana González nun ye más qu’una mera declaración d’intenciones. Asina, posibilita que la Casa Conceyu publicite actos relixosos cuandu éstos tengan “interés” turísticu o cultural, un coladeru que permitirá publicitar non sólo la Selmana Santa, sinón tamién cualisquier otra cellebración relixosa. El testu tamién permite que los conceyales participen n’actos relixosos.
Éstos son los regalos envelenaos, de momentu tres, colos que se despide l’alcadesa de Xixón na torna a la so llocalidá de La Fresneda.
Llamentablemente, conocíu’l programa qu’anuncia’l PSOE de Floro, queda perñidio que’l PSOE ufre más de lo mesmo pa los prósimos cuatru años de xestión municipal. “Más de lo mesmo” ye una propuesta bien ruina, precisamente cuandu la ciudá necesita con urxencia un cambéu rial haza una política bramente socialista, democráticamente participativa y sofitá nos intereses de la ciudadanía, non nos de lobbys de presión de tou tipu.
