El determín de presentase a estes elleiciones tomóse al nun cuayar la nuesa propuesta d’un Frente Ampliu ente organizaciones asturianes. Les candidatures d’Andecha Astur representen la única opción cola que’l futuru d’Asturies nun se decidirá’n Madrid
Les compañeres y compañeros d’Andecha Astur dediquemos los caberos meses, comu mos comprometimos, a intentar la formación n’Asturies d’un frente ampliu, un frente común nel que mos axuntáremos cuantes organizaciones tenemos proyeutos d’ámbetu asturianu y d’esquierdes. Víamos nello’l camín más conveniente pa costruyir el futuru d’Asturies de mou qu’ésti nun se continuare decidiendo’n Madrid.
Pero nun foi posible, aquellos que pudieron aidar a conformar una opción asturiana común prefirieron situase comu satélites de partíos d’ámbetu español. Llamentámoslo enforma, pero ficimos cuantu pudimos por llogralo, y pesia nun ser posible nesta ocasión, caltendremos la propuesta con tol enfotu pal futuru.
Agora bien, la voluntá de les compañeres y compañeros d’Andecha Astur nun ye collaborar pa que’l futuru d’Asturies se siga decidiendo’n Madrid. Nun queremos más trenes madrilanos que nunca lleguen o que nun entren pelos túneles del nuesu país. Poro, el nuesu compromisu, precisamente, ye siguir ufriendo a les asturianes y asturianos una ferramienta de participación y costrución d’un proyeutu social de progresu p’Asturies, un proyeutu desiñáu por ellos mesmos y afayáu a les sos necesidaes, un proyeutu alternativu que nun s’amolde al sistema sinón que lu sustituya por un nueu modelu de gobiernu que camine haza’l socialismu y la participación popular.
Ello asina, Andecha Astur acaba de presentar la so candidatura a les prósimes elleiciones a la Xunta Xeneral d’Asturies. Sintimos que mos obliga a ello’l nuesu compromisu con esta tierra, la nuesa trayeutoria na defensa de los asturianos comu clas y comu pueblu. Una candidatura popular y asturiana qu’encabecen Diego Morís y Llucía Fernández pola circuscrición central, mentantu Ánxel Pardo y Ana Isabel Ríos abren la llista del ocidente, y Xabel de Cea y Mª Teresa Velasco la del oriente.
Asina mesmo, Andecha Astur presenta candidatura nes elleiciones a la Casa Conceyu d’Uviéu y a la de Xixón. Miguel Ánxelu Agudo y Dulce Gil encabecen la llista de la capital, mentantu que la de Xixón ábrenla Alexander Martínez y Carme Pérez.
Toles compañeres y compañeros que conformen les candidatures d’Andecha Astur saben perbién cómu Asturies necesita una nuea forma de gobernase, na que quienes viven equí costruyan a comuña’l so futuru. Porque les asturianes y asturianos persabemos, sin que naide mos lo organice dende fora, qué necesitamos y qué queremos pa los nuesos pueblos, ciudaes, montes, mar, escueles, hospitales, residencies xeriátriques, emplegos, sofitos sociales, llingua, artesanía, produciones culturales, deportes, carreteres, trenes, industries, enerxía, ociu… Porque ná sirvirá meyor a los nuesos intereses comu comunidá qu’aquelles iniciatives y regulaciones qu’escoyamos n’Asturies.
