Andecha Astur sofita les actividaes que güei entama Asturies Insumisa, una plataforma social de xuntanza por una Asturies pa toes
Demientres tol mes d’Abril, Asturies Insumisa vieno faciendo abondes actividaes d’alderique y reflexón sobro la situación de l’Asturies d’anguañu.
Güei, 29 d’abril, Asturies Insumisa va tener actividaes tola xorná, nel barriu Cimavilla, xeres que finarán cola presentación pública d’esta plataforma social y un conciertu de La Tarrancha, Ochobre y Escuela d’Odio (Xixón, Albeniz, 19 h.).
Nesa presentación va tar Andecha Astur, porque ye parte d’esta plataforma d’organizaciones. La intervención de presentación d’Andecha va tar a cargu de Diego Morís, Roxu, candidatu por Andecha Astur nestes elleiciones nacionales, y responsable de la Estaya Llaboral de la organización.
Tamos ciertos de qu’Asturies Insumisa va ser una ferramienta social prestosa y afayaíza. Y va selo porque quier enllenar les cais d’allegría y vindicación, porque nagua por ximielgar esti país astur pa que la clas trabayaora retome la concenxa y el compromisu de defendese, porque trabaya por un nueu modelu de sociedá pa toes, porque garantiza les llibertaes, porque llucha por sirvicios públicos de calidá, porque puxa por trabayos y salarios y pensiones dignos, porque vindica la xusticia social y el repartu la riqueza, porque pon en valor la presona y la nuesa identidá comu clas y comu pueblu perriba l’arriquecimientu d’unos pocos y la esplotación de la nuesa tierra.
Andecha Astur ta arguyosa de participar nuna plataforma social comu ésta. Ta contenta de coincidir con tantes compañeres de tantes organizaciones y movimientos sociales que naguen por camudar la rialidá. Esi arguyu, esi contentu enllénamos porque tamos convencíos d’una sola cosa: Asturies y la so clas trabayaora tienen futuru y esi futuru sólo va ser rialidá si lu costruyimos toes a comuña. Pa eso tamos n’Asturies Insumisa. Pa caminar xuntes, pa facer país pa toes.
