La Xunta Elleutoral refuga escritos n’asturianu d’Andecha Astur

Otru llogru de la invisible “oficialidá amable” de Barbón, col que se torga amás papeletes y drechu al votu na llingua’l país, y el respetu a la toponimia

Andecha Astur presentó n’asturianu les sos candidatures a les elleiciones nacionales y de conceyu. La Xunta Elleutoral d’Asturies y les de Zona tuvieron d’almitiles asina, porque, tres muncho batallalo nos tribunales, nel añu 2000 Andecha Astur consiguió, pa tolos asturianos y asturianes, que’l Tribunal Costitucional reconociere’l drechu a presentar candidatures na nuesa llingua.

Sicasí, hai unos díes Andecha Astur dirixóse n’asturianu a la Xunta Elleutoral d’Asturies pidiendo que, igual que los partíos puen exercer el drechu a presentase na llingua’l país, la ciudadanía puea exercer el drechu equivalente: votar n’asturianu. Pa ello pidíase a la Xunta Elleutoral qu’espublizase papeletes de votu na nuesa llingua, incluyendo la toponimia.

Pos bien, la Xunta Elleutoral d’Asturies acaba decidir que refuga la presentación d’esti escritu d’Andecha Astur por nun tar presentáu nun idioma oficial. Esto ye, podemos presenta-yos escritos n’euskera, catalán y gallego, pero non na llingua d’Asturies.

Esti nueu casu de represión llingüística representa un manotazu más na cara de tolos asturianos pol solu fechu de tener llingua propia. Y hai que señalar con claridá, qu’estos casos represivos son posibles “gracies” a un Adrián Barbón que pasó cuatru años de gobiernu cararexando ser el gran defensor d’una oficialidá “amable”, que llueu resultó ser invisible y pura propaganda.

Andecha Astur va siguir insistiendo, per toles víes posibles, en garantizar el drechu al usu l’asturianu na comunicación cola Alministración y nel mesmu exerciciu del drechu al votu.

Andecha Astur tamién acaba pidir la intervención de l’Academia de la Llingua Asturiana, comu muérganu defensor cimeru de los drechos llingüísticos del Pueblu Asturianu.

Cuandu’l prósimu 6 de mayu, Asturies salga a la cai vindicando la oficialidá del nuesu idioma, toos mos alcordaremos d’una Xunta Elleutoral que torga los nuesos drechos llingüísticos y d’un Adrián Barbón que, abellugáu nes siegles del PSOE, arrampuñó a los asturianos esos drechos durante cuatru años más.