Énte unos Gobiernos “progresistes” que sólo son xestores de los mercaos del capital, ye mester que la clas trabayaora torne a la cai
Andecha Astur cellebra la esistencia d’una convocatoria xunitaria del sindicalismu de clas pa esti 1 de Mayu. Poro, llama a participar nel manifestamientu que CNT, CGT, CSI y SUATEA van facer en Xixón.
Diego Morís, Roxu, candidatu d’Andecha Astur a la Presidencia’l Gobiernu d’Asturies, participó ayeri na presentación d’Asturies Insumisa y ellí compartió, con claridá, la postura d’Andecha Astur en cuantes a los oxetivos que tien de plantegase la llucha de la clas trabayaora.
En pallabres de Diego Morís: “Hai que tornar a enllenar les cais d’allegría y vindicación. Hai que ximielgar esti país astur pa que la clas trabayaora retome la concenxa y el compromisu de defendese. Hai que lluchar polos intereses de clas. Hai que costruyir a comuña un nueu modelu de sociedá pa toes. Hai que garantizar les llibertaes. Hai que preservar sirvicios públicos de calidá. Hai que puxar por trabayos y salarios y pensiones dignos. Hai que vindicar la xusticia social y el repartu la riqueza. Hai que poner en valor la presona y la nuesa identidá comu clas y comu pueblu, perriba l’arriquecimientu d’unos pocos y la esplotación de la nuesa tierra”.
Poro, Andecha Astur sofita esta convocatoria del 1 Mayu que faen los sindicatos de clas. Y comprométese a defender esos postulaos na so ación sociopolítica, asina comu a trabajar en xuntanza con esa mayoría del movimientu obreru que los comparte.
Andecha Astur señala tamién, comu reflexón pa esta xorná vindicativa del 1 Mayu, que ye tiempu de que n’Asturies mos comprometamos mayoritariamente na defensa d’alternatives polítiques que garanticen el futuru los asturianos y asturianes comu pueblu y comu clas. Ye tiempu de separtar de los gobiernos aquellos partíos seudosocialistes y seudoprogresistes que, traicionando revoluciones prometíes y los intereses reales de la clas trabayaora, sólo faen polítiques que nun suponen dengún riesgu pal sistema capitalista, nin nengún avance sinificativu haza la xusticia social y el repartu la riqueza.
El nuesu futuru comu pueblu y comu clas nun ta, nun pue tar en manes de partíos que sólo son xestores de los mercaos del capital.
Puxa’l 1 Mayu
Puxa la clas trabayaora
Puxa Asturies
