El manifestamientu del 6 de mayu sedrá otru pasu allantre na Oficialidá que lleva torgándomos el PSOE más de 40 años
Esti sábadu, 6 de mayu, Andecha Astur sofita’l manifestamientu pola oficialidá que se va facer n’Uviéu. Ye mester denunciar, un añu más, cómu los estremaos gobiernos “autonómicos” que careció Asturies, col sofitu los partíos españoles, sólo valieron pa perpetuar la represión de los drechos llingüísticos del Pueblu Asturianu, entamando pola oficialidá de la so llingua.
Salimos tamién a la cai a dar otru pasu allantre nesa Oficialidá que ye imparable, y pa señalar al PSOE comu principal axente de la represión llingüística. Tres más de 40 años torgando la oficialidá, Adrián Barbón gastó estos caberos cuatru años nuna operación propagandística de gran alcance: vender comu bonu un supuestu, inesistente ya inútil “modelu d’oficialidá amable” y escusase na falta de 27 votos na Xunta Xeneral; cuandu’l PSOE, con mayoría asoluta y ensin ella, nunca nun tuvo compromisos activos na defensa l’asturianu. Cualisquier pequeñu avance que se dio (artículu 4u del Estatutu, ALLA, escolarización, Llei d’Usu, toponimia…) debióse siempres a la llucha exemplar ya irreductible que’l Pueblu Asturianu protagoniza na defensa la so llingua.
Oficialidá darréu, escolarización comu lllingua vehicular, llingua de comunicación de l’Alministración, medios de comunicación pública n’asturianu dafechu, xeneralización de la toponimia tradicional, polítiques actives de normalización social, enanchar les fonciones y el financiamientu de l’Academia de la Llingua (especialmente comu muérganu defensor de los drechos llingúísticos)… Ési ye’l camín que garantizaría’l futuru l’asturianu comu llingua viva. Agora bien, hai de tenelo claro, esa política llingüística avanzá enxamás nun la va poner en marcha un partíu d’ámbetu español, abasta ver cómu otros pueblos del Estáu recorrieron el so propiu camín haza la normalización de les sos llingües.
Nesi sen, sintímosmos arguyosos de qu’Andecha Astur pue sofitar esti manifestamientu pola oficialidá amosando un llargu curriculum de coherencia y compromisu claru colos drechos llingüísticos del Pueblu Asturianu. Y disponiendo d’un Plan d’Oficialidá y Normalización que, desendolcáu dende la Xunta Xeneral y dende les Cases Conceyu, garantizaría de veres el futuru la nuesa llingua.
Esti sábadu, 6 de mayu, amosémosmos insumisos al réxime de represión llingüística que piloten el Gobiernu de Barbón y el Gobiernu madrilanu del PSOE-IU-Podemos. Faigamos notar esa Asturies insumisa que puxó, puxa y puxará pola oficialidá de la llingua d’esti país.
