Sigue la represión por usar l’asturianu coles Xuntes Elleutorales. Namás-y pasa a Andecha Astur porque les demás organizaciones arrenuncien al usu l’idioma.
La represión llingüística n’Asturies prevoca yá situaciones sicodéliques. Andecha Astur rexistró na Xunta Elleutoral de Xixón un escritu pidiendo que se garantice, con papeletes n’asturianu, la posibilidá d’exercer el drechu al votu na nuesa llingua. Pos bien, esa Xunta acaba unviamos la so rempuesta, que, n’español, resume perfechamente lo que-y pidíamos, pa finar diciendo que mos dexise la presentación d’esi documentu n’español. Esto ye, la Xunta Elleutoral reconoz tácitamente que’l motivu pa pidimos el testu n’español nun ye porque nun lu entiendan, pos resúmenlu perfechamente n’español, sinón que se reduz a un puru mecanismu anulaor de la identidá asturiana.
Hai que remembrar cómu díes atrás foi la Xunta Elleutoral d’Asturies la promotora de la represión sicodélica: cuandu mos dixo que podíamos presenta-y escritos n’euskera, catalán, gallego o español, pero non n’asturianu.
Andecha Astur, ente estos fechos graves y doliosos, fai dos considerances.
- La primera ye que la represión llingüística n’Asturies esiste y dase tolos díes. Y que si se percibe comu un problema menor de lo que ye débese a que los demás partíos políticos nun quieren emplegar l’asturianu comu llingua ñatural de comunicación cola Alministración elleutoral y cola ciudadanía, arrenunciando yá ellos d’antemán a caltener la nuesa identidá cultural y llingüística, facilitando d’esti mou’l llabor de desaniciu de l’asturianía.
- La segunda ye que denunciamos a les Xuntes Elleutorales porque son elles les que firmen eses demandes propies del más ranciu imperialismu llingüísticu; pero si eses Xuntes lo faen ye porque-yos lo permite’l marcu llegal.
Y los responsables políticos d’esta represión son Adrián Barbón y el PSOE, que lleven más de 40 años lliderando la resistencia sociopolítica que torga la reconocencia oficial de la llingua asturiana. Si’l PSOE, y los partíos que lu suelen agabitar (IU, Podemos) dalguna vegá se plantegaren comu imprescindible la oficialidá de la nuesa llingua, ésta gociaría de calter oficial dende hai años.
En tou casu, Andecha Astur comprométese públicamente tanto a defender alternatives de progresu rial en materia emplegu, sanidá, enseñu, tresporte, equillibriu territorial, economía, agricultura, ganadería, pesca, mediuambiente, biesques, vivienda, mocedá, industria, turismu, demografía… comu a defender los drechos llingüísticos de la ciudadanía cola coherencia de nun renunciar al emplegu l’idioma’l país.
