L’Academia de la Llingua Asturiana espresó la so voluntá de defender los drechos llingüísticos de tolos asturianos nos procesos elleutorales
Ayeri’l Secretariu de l’Academia de la Llingua Asturiana, Xosé Ramón Iglesias Cueva, recibió a Diego Morís ‘Roxu` (candidatu a presidente del Gobiernu d’Asturies por Andecha Astur) y a Mariano Suárez (miembru de la Xunta Executiva d’Andecha Astur).
El motivu foi presentar con urxencia a l’ALLA’l llargu y abegosu camín que protagoniza Andecha Astur pa consiguir la reconocencia del idioma d’Asturies nos procesos elleutorales, camín nel que tamos atopando fechos represivos claros y nel que tamién tamos llogrando avances sinificatibles que favorecen el respetu los drechos llingüísticos colleutivos.
Nel alcuentru falóse de la Sentencia 48/2000, de 24 de febreru de 2000, emitía por la Sala Segunda del Tribunal Costitucional, reconociendo’l drechu d’Andecha Astur,y dende entós el de tolos partíos, a presentar les candidatures n’asturianu. Magar qu’esi drechu esiste, paez, increyiblemente, que sólo lu ta exerciendo Andecha Astur.
Tratóse d’una sentencia hestórica qu’abrió una nuea forma d’interpretación costitucional del usu l’asturianu nos procesos elleutorales, reconociendo l’Estáu español qu’a vegaes yera preferible permitir el so usu, magar nun seya oficial, pa nun torgar, cola so prohibición, los drechos elleutorales, que tien en superior consideranza.
Tamién analicemos cómu les Xuntes Elleutorales tán refugando sistemáticamente los escritos n’asturianu que-yos presenta Andecha Astur. Esta represión llingüística fae cuasi imposible la necesaria y llegal comunicación ente l’Alministración elleutoral y Andecha Astur, dexándomos nuna situación de desigualdá d’oportunidaes manifiesta énte los demás partíos, qu’escoyeron rellacionase siempres n’español coles Xuntes Elleutorales. Asina, esta represión imposibilítamos participar n’iguales condiciones que los demás nel repartu d’espacios públicos pa mitines, paneles asinaos pa propaganda, cais pa encartelar faroles, espacios nos medios de comunicación públicos…
Dambes partes coincidimos en que’l fechu de que la Xunta Elleutoral d’Asturies torgue tolos escritos n’asturianu, los desixa n’idioma oficial y llueu aceute un documentu’n catalán, previamente refugáu n’asturianu, ye un símbolu escandalosu de fasta ónde algama la represión llingüística n’Asturies y de cómu esti país necesita urxentemente una declaración d’oficialidá, con reconocencia de plenos drechos llingüísticos. Mentantu, l’ALLA tresmitió’l so compromisu de defender siempres a toles víctimes de la represión llingüística y de poner en marcha los sos mecanismos pa llogralo.
