Col mesmu puxu, seriedá ya honradez, Andecha Astur defende los drechos sociales, llaborales, económicos, d’identidá sesual, medioambientales… de toes
Andecha Astur demuestra cola so práutica, llarga y pública, que nunca nun dobla na defensa los drechos colleutivos que comu pueblu o comu clas correspuenden a les asturianes y asturianos.
Sólo a la so insistencia se deben los avances que se van llogrando nel usu normalizáu del asturianu nos procesos elleutorales. Nel 2000, tres un llargu procesu xudicial, algamó una sentencia fundamental nel Tribunal Costitucional español: poder presentar les candidatures n’asturianu. Un drechu que se llogró non sólo p’Andecha Astur, sinón pa la totalidá de los partíos políticos asturianos. Sicasí, sólo Andecha Astura utiliza esi drechu; los demás partíos lleven 23 años renunciando con descaru y desafeición al usu d’esi drechu, ñegándose a defender l’asturianu emplegándolu nún de los casos “permitíos” pol Estáu.
Ayeri mesmo, Andecha Astur algamó otru ésitu en materia de drechos llingüísticos: la Xunta Elleutoral d’Asturies validó l’usu de papeletes d’Andecha Astur n’asturianu y agora los sos votantes podrán depositales llegalmente nes urnes. Eso sí, la represión condiciona entá l’exerciciu del drechu al votu, porque l’Alministración nun facilita papeletes n’asturianu, ye ca partíu’l que tien de pidir la so validación y pagar la so impresión. Y les papeletes n’asturianu nun puen tar presentes nes meses y cabines de los colexos elleutorales; ca votante tien de trayer de casa la so papeleta n’asturianu.
Les Xuntes Elleutorales de Xixón y Uviéu tán retrasando tolo posible la so rempuesta, que tendrá de ser favoratible tamién, al usu papeletes n’asturianu. Tal paez que lo retrasen pa llueu, cuandu mos reconozan tamién esi drechu, cuasi nun dispongamos de díes pa imprimir y distribuyir les papeletes nel nuesu idioma. Porque la represión de los nuesos drechos tien a vegaes formes sibilines.
Llaceriosamente, Andecha Astur ye tamién la única organización política que pidió la validación de les sos papeletes n’asturianu. Les demás, pudiendo, nun quieren ufrir esi drechu al so elleutoráu. Estos fechos faen difícil que podamos pescanciar qué tipu d’oficialidá y de normalización de los drechos llingüísticos defenden en rialidá. Pos, en viendo la so conducta, talamente paez que protexen sólo los intereses del amu’l cafetal, dexando nuna gravísima indefensión a los esclavos del mesmu.
Andecha Astur lleva décades amosando públicamente que nunca cede na defensa de los drechos de les asturianes y asturianos comu pueblu y comu clas.
El nuesu compromisu, el nuesu puxu, la nuesa honradez, la nuesa práutica… amuesa perbién que nun somos sólo “el partíu de la llingua”, somos el partíu d’Asturies. De toa Asturies y de tola xente asturiano.
Somos de los que se pue esperar con certeza la mesma garra pa defender la oficialidá que’l drechu al repartu la riqueza, a la xusticia social, al trabayu, a los sirvicios públicos de calidá, a la idendidá sesual, al curiáu social, a la vivienda, al desaniciu la precariedá, a vivir na nuesa tierra, a caltener les actividades tradicionales, a nun emigrar a la fuercia, a caltener la nuesa cultura, a defender los nuesos productos, a desaniciar la casta, a l’auténtica participación popular na xestión política, a decidir xuntes el futuru…
Andecha Astur ye’l partíu que ta contigo. Y contigo podemos facer posible una Asturies pa toes y toos.
