Tres esti trunfu hestóricu, Andecha Astur convita a toles organizaciones polítiques que se presenten n’Asturies a qu’ufierten a los sos votantes la posibilidá de votar n’asturianu.
La Xunta Elleutoral d’Asturies vien de dar la razón a Andecha Astur. Almitió los recursos nos que denunciábamos comu carentes de valor xurídicu les resoluciones de les Xuntes Elleutorales d’Uviéu y Xixón que prohibíen l’usu papeletes n’asturianu nes votaciones del 28 mayu. Ye más, la Xunta Elleutoral d’Asturies va notificar a toles Xuntes de Zona y a toles meses elleutorales del país el so determín de siguir garantizando l’usu l’idioma nes votaciones.
Esti trunfu perafita l’avance hestóricu que yá consiguió Andecha Astur nel añu 2000 énte’l Tribunal Costitucional y pon n’evidencia’l nulu avance en tou esti tiempu na reconocencia de los drechos llingüísticos de los asturianos, y cómu dende’l ‘Principado’ lo único que se fai son polítiques de xestos y declaraciones de bones intenciones, mentes s’allarga inxustificablemente la necesaria normalización democrática d’Asturies na tema llingüística
Con esta resolución, Andecha Astur consigue garantizar un drechu colleutivu, que pue exercer tol elleutoráu. Ello asina, convita a toles organizaciones polítiques que se presenten n’Asturies a qu’ufierten a los sos votantes la posibilidá de votar n’asturianu, pasando de la política de declaraciones a los fechos.
Pesia too ello, Andecha Astur quier recordar y denunciar que les condiciones d’usu del asturianu algamaes nun ye que sean insuficientes, ye que son inxustificables, costituyendo un auténticu apartheid llingüísticu, darréu que pa poder votar n’asturianu hai que trayer la papeleta de casa, porque la Xunta Elleutoral nin emite, nin permite la presencia de papeletes n’asturianu nes meses elleutorales.
Per otru llau, Andecha Astur quier destacar como’l consiguir drechos democráticos tan básicos namás ye posible con un exerciciu continuáu de coherencia política, con un costu en tiempu, en recursos humanos y materiales que mos impide participar n’igualdá de condiciones que’l restu los partíos yá que, por exemplu, nun mos foi posible rializar les llabores de buzonéu.
A la fin, dende Andecha Astur reafirmámosmos nel compromisu con esti pueblu y na coherencia na práutica política, y lo mesmo que –por casu- llevemos allantre’l Casu Nicolasa, conseguimos paralizar el PGOU de Llanes, o llevar al xulgáu a los estafadores del ‘Muselón’, tamién conseguimos afitar los avances na tema llingüística.
Asina mesmo, tamién queremos agradecer el sofitu y solidaridá de l’Academia de la Llingua Asturiana, d’Iniciativa pol Asturianu y de N’Ast en tol procesu de llucha xurídica pol drechu al votu n’asturianu.
