Andecha Astur desixe que los Centros Educativos nun seyan oxetu de propaganda militarista

Andecha Astur desixe a Educación que los centros nun seyan platós propagandísticos del Ministeriu l’Interior, y pide la dimisión del Direutor del Colexu La Carriona

 Desixe salir del Plan Direutor del Ministeriu l’Interior que, dende Madrid, afala’l militarismu nes escueles asturianes

Tovía llevanta amueses de rechazu lo asocecío apocayá nel Colexu La Carriona (Avilés), onde l’escolináu tevo de presenciar una serie d’actuaciones de la Policía Nacional española, presentando varies de les sos xunidaes, ente elles una Unidá d’Intervención Policial (UIP). Esta fuercia policial especial intervino énte l’escolináu de La Carriona presentando comu si ná uniformes d’intervención especial, escudos, toletes, escopetes llanzapelotes y otros materiales antidisturbios.

Fechos asemeyaos a éstos asoceden dacuandu nos centros educativos asturianos, a vegaes con policíes, a vegaes con otros cuerpos o fuercies de seguranza del Estáu. Asina la Guardia Civil, un cuerpu militarizáu, intervino énte l’escolináu del Colexu d’Arenas (Cabrales, abril 2022), del Colexu Príncipe Felipe (Tapia, mayu 2022), del Colexu La Vallina (Lluanco, abril 2023) o del Colexu Peña Tú (Llanes, abril 2023).

Lo más grave ye qu’estes actuaciones policiales y militares nes escueles tán sofitaes tanto pol Gobiernu “megaprogresista” de Madrid comu pol de Barbón, y respuenden al so determín de blanquiar el militarismu y el monopoliu estatal de la fuercia énte les neñes y neños d’Asturies. Poro, la Conseyería d’Educación soscribe voluntariamente ca añu la so collaboración nel “Plan Direutor pa la convivencia y meyora de la seguranza nos centros educativos”, que tolos cursos ellabora’l Ministeriu l’Interior y que tien comu oxetivu reconocíu “que xorreza l’enfotu la reciella y la mocedá nes Fuercies y Cuerpos de Seguranza del Estáu”.

Esti plan ye’l que permite que nos centros educativos d’Asturies se tean viendo recreaciones d’intervenciones de los antidisturbios, xeres de desactivación d’esplosivos, amueses d’armes de fueu y materiales represivos, recreaciones de detenciones de supuestos delincuentes, etc.

Los oxetivos propagandísticos del Ministeriu l’Interior paez que se cumplen a vegaes, cuandu na prensa apaecen testimonios de neñes y neños que dicen “ye too mui guai”, “vemos qu’aíden a les presones y detienen a los malos”. Lo mesmo qu’apaecen policíes y guardies civiles afitando que la de so “ye una profesión mui prestosa”, que “equí va salir muncha vocación” y que “los neños tán llamaos a sucedemos”.

Énte la gravedá d’estos fechos, Andecha Astur pide al Gobiernu de Barbón que la Conseyería d’Educación se desvincule del Plan Direutor del Ministeriu l’Interior, garantizando que los nuesos centros educativos dexen de ser platós progangísticos del militarismu español.

Situaciones comu les que denunciamos lleven asocediendo décades, dende los tiempos del inefable Rubalcaba, que punxo’n marcha esta estratexa pa diluyir la nuesa concenxa comu asturianos y comu clas trabayaora. Dende entós foron munchos los centros educativos, los equipos direutivos que, escusándose con una normativa impresentable pero esistente, abrieron les so puertes a los cuerpos y fuercies de seguranza del Estáu. Sicasí, nun remembramos ná apaecío a lo que se permitió agora nel Colexu La Carriona. Ye un fechu d’especial relevancia, d’un simbolismu cimeru, d’una especial gravedá que nuna escuela pública se pretenda camuflar la eshibición d’una carga policial de la UIP comu si d’un actu educativu se tratare. Fasta agora la policía presentábase nes escueles con caballos, con perros, con robots, con drones, con vehículos… Pero dexar que la UIP corra pel patiu la escuela con escopetes llanzapelotes nes manes… ye una imax que va más allá de cualisquier alderique ideolóxicu razonatible y que nun atopa encaxe en nengún modelu educativu públicu.

Poro, dada la especial gravedá de lo asocedío nel Colexu La Carriona, onde se blanquió la fonción de les Unidaes d’Intervención Policial, con toa clas de material antidisturbios, Andecha Astur solicita que la Conseyería d’Educación cese urxentemente al direutor d’esti centru.

Porque nes escueles d’Avilés, si, pa defender la memoria democrática, sólo la más recién, hai que cuntar al escolináu daqué de los antidisturbios, ye que son les fuercies del Estáu que dexaron firíos nes cais a trabayaores d’Asturiana de Zinc en 2008, les qu’apalizaron y detuvieron trabayaores d’Alcoa en 2019, les qu’ocuparon carreteres avilesines pa frañer la fuelga’l tresporte’n 2022…