Andecha Astur lleva a Fiscalia por delitu d’odiu a la conceyala de VOX

Andecha Astur denuncia comu delitu d’odiu`l vetu la conceyala xixonesa de Vox a los artistes asturfalantes

Sara Álvarez Rouco cometería’l delitu con agravantes d’alevosía, prevalencia de cargu públicu y reincidencia

Andecha Astur vien de denunciar énte la Fiscalía Superior d’Asturies a Sara Concepción Álvarez Rouco por un presuntu delitu d’odiu. Na so condición de militante del partíu facista Vox, ye conceyala Festexos y miembru la Xunta Gobiernu na Casa Conceyu de Xixón, amás de diputá na Xunta Xeneral d’Asturies.

Comu conceyala participó’l 23 de xunu nel programa radiofónicu “Más d’ún”, que dirixe Guillermo Figueroa n’Onde Cero. Ellí, falando de los planes de la so conceyalía pa esti branu, entrugóse-y si contrataría pa los festexos braniegos a los artistes que s’espresen n’asturianu, a lo que la conceyala retrucó “si se pue, non”.

Andecha Astur entiende que declarar esta voluntá manifiesta de discriminar a una parte la población por motivu de llingua ye ún de los casos ñidiamente tipificaos comu delitu d’odiu nel artículu 510 del Códigu Penal y na Circular de la Fiscalía Xeneral del Estáu sobro interpretación de los delitos d’odiu, siendo posible castigar esti delitu con penes de prisión d’un a cuatru años, amás de multes.

La conceyala facista, al facer eses declaraciones, amuesa’l so despreciu non sólo pola so Costitución española, sinón tamién pol Estatutu d’Autonomía p’Asturies, pola Llei d’Usu y Normalización del Asturianu, pola Declaración Universal de los Drechos Homanos, pol Protocolu n^u 12 del Conveniu Européu pa la Proteición de los Drechos Homanos y de les Llibertaes Fundamentales, pola Carta los Drechos Fundamentales de la Xunión Europea y pola Recomendación de Política Xeneral n^u 15 de la Comisión Europea escontra’l Racismu y la Intolerancia.

Poro, Andecha Astur pide a la Fiscalíal’apertura d’una investigación sobro les declaraciones de Sara Concepción Álvarez Rouco, acusándola d’un presuntu delitu d’odiu por discriminación por motivu de llingua, y coles agravantes d’alevosía, prevalencia de cargu públicu y reincidencia.          `

L’agravante de reincidencia sofítase en que la denunciá, siendo yá diputá de la Xunta Xeneral na cabera llexisllatura, acudió’l 14 d’ochobre de 2019 a un actu na Xunta Xeneral pa remembrar el Díi de les Escritores. Tando ellí, abandonó l’actu con escándalu nel intre en que Marta Mori, vicepresidenta de l’Academia de la Llingua, anició la so intervención espresándose n’asturianu. Darréu, la diputá’l partíu facista declaró que fuxó del actu por repudiar que Marta Mori s’espresare na llingua d’Asturies.

Andecha Astur entiende qu’una política antifacista eficaz conlleva la rempuesta sistemática a ca agresión o intentu de prevocación por parte, nesti casu, de Vox. Nesa llabor debemos tar xuníos tola clas trabayaora y cuantos mos sintimos asturianos. Poro, énte esta agresión de la conceyala xixonesa, encamentamos a les organizaciones asturianes d’esquierdes que valoren la urxencia d’aperiar un frente común pa defender los nuesos intereses comu asturianos y comu clas de los ataques procedentes del facismu y del neolliberalismu.