Entiende que nun puen continuar en silenciu énte les declaraciones rializaes pola conceyala de Vox y responsable de la estaya Festexos, Sara Concepción Álvarez Rouco
Andecha Astur acaba dirixise a los grupos municipales de PSOE, IU y Podemos na Casa Conceyu de Xixón, con rellación a los fechos protagonizaos apocayá por Sara Concepción Álvarez Rouco, conceyala de Vox y responsable de la estaya Festexos, qu’anunció que nun quier contratar artistes asturfalantes pa les fiestes de Xixón.
Una selmana dempués d’esta amuesa de facismu cultural, la supuesta oposición política al entente Foro-PP-Vox, sigue guardando un silenciu inxustificable. Nós nun creyemos qu’esti seya un casu de los que “quien calla, otorga”, pero habrá xente a los que sí-yos lo paeza.
La sociedá xixonesa, y l’asturiana’n xeneral, amosó yá un altu nivel d’esmolecimientu énte esta agresión a la identidá asturiana. L’allarma social énte ún de los fechos más graves asocedíos caberamente nel escenariu políticu asturianu ye evidente.
Andecha Astur, atendiendo a la nuesa responsabilidá comu ciudadanes y comu organización política, yá retrucó con urxencia. Presentemos darréu una denuncia énte la Fiscalía Superior d’Asturies, señalando que la conceyala Festexos de Xixón cometiere un supuestu delitu d’odiu, coles agravantes d’alevosía, prevalencia de cargu públicu y reincidencia.
Sicasí, la gravedá de la conducta de la conceyala Festexos desixe que non sólo Andecha Astur reacione con claridá y rapidez énte la primer amuesa de facismu cultural que protagoniza l’equipu de gobiernu municipal.
La ética política y tamién la responsabilidá qu’asumieron comu partíos con representación municipal, fae necesario que PSOE, IU y Podemos comuniquen públicamente non sólo la so valoración de los fechos que denunciamos, sinón tamién qué iniciatives polítiques van tomar pa poner remediu a esta situación, p’asegurar que l’actividá municipal respeta la llexisllación vixente, pa garantizar los drechos democráticos de la ciudadanía y pa torgar agresiones a la identidá cultural asturiana.
Y esto ye lo qu’acabamos de solicitar por escrito a los sos grupos municipales na Casa Conceyu de Xixón. Porque los votantes de PSOE, IU y Podemos, asina comu la ciudadanía’n xeneral, merecen el respetu de ser informaos sobro les propuestes que tienen pa defender en Xixón los drechos democráticos colleutivos.
Llevamos esperando una selmana, dexándo-yos tiempu pa que llibremente cumplieren con esa responsabilidá democrática que tienen. Entá naide nun sabe ná d’ellos. La rempuesta, si la dan, va llegar un pelín tardi, pero meyor eso qu’un silenciu que, entós, si los convertiría en cómplices pasivos del facismu cultural qu’entama xenerar en Xixón la entente Foro-PP-Vox.
