El Gobiernu PSOE-Sumar-Podemos-IU prohibe l’usu l’asturianu nel tf. Arcuíris 028, comu fizo nel tf. 016 pa víctimes de violencia xéneru
Entámase’l teléfonu Arcuíris 028, p’atender a les víctimes de delitos d’odiu y discriminación por LGTBIfobia. La noticia ye bona, pero ello nun quita qu’esti determín llega mui tardi, al acabu la xestión d’esti gobiernu español, autonomáu el “más progresista” de la hestoria. Ye claro qu’esti sirviciu d’atención a drechos básicos aporta sero y nuna dómina na que va ser difícil dexalu foncionando comu un sirviciu consolidáu.
Al marxe d’esta consideranza, abulta normal defender qu’un sirviciu públicu escontra una fobia recoyía nel Códigu Penal nun pue ñacer alitando, él mesmu, otra fobia más, igualmente punible.
Pos eso ye lo que vien de facer el gobiernu PSOE-Sumar-Podemos-IU, al anunciar que’l veta l’usu l’asturianu nel sirviciu d’atención del 028, que va atender esclusivamente n’español, catalán, gallego, euskera, inglés y francés.
Hai tiempu la ministra d’Igualdá, Irene Montero tamién ordenó que’l sirviciu d’atención teléfónica 016, pa víctimes de violencia xéneru, atendiere les llamaes en 53 idiomes, torgando l’asturianu. Asina ye que’l 016 atiende llamaes n’euskera, catalán, gallego, español, inglés, francés, alemán, portugués, chino mandarín, ruso, árabe, rumano, búlgaro, afgano, albanés, armenio, bambara, bereber, bosnio, brasileiro, cantonés, checo, coreano, danés, esloveno, eslovaco, farsi, finés, georgiano, griego, hindi, holandés, húngaro, italiano, japonés, lituano, mandinca, noruego, persa, polaco, poulaar, serbocroata, sirio, soninké, sueco, tailandés, taiwanés, tamazight, turco, ucraniano, urdu y wolof; pero ñégase a atendete n’asturianu.
Esta actitú d’ufrir una iniciativa pública a los asturianos, pero prohibiéndo-yos la participación usando la nuesa llingua, ye llargamente conocía y sufría polos asturianos. Curiosamente esta represión, esti odiu, esta asturfobia prautíquenla siempres partíos d’ámbetu español, independientemente de les cordenaes nes que s’asitíen nel espectru ideolóxicu.
Asina ye que nun hai diferiencia ente la prohibición que’l fae’l gobiernu español de PSOE-Sumar-Podemos-IU y la recién prohibición qu’anunció la conceyala Festexos de Vox en Xixón, afitando que se ñegará a contratar artistes asturfalantes.
Atopamos el mesmu odiu en ñegar un contratu a una cantante n’asturianu que’n ñegar l’usu l’asturianu a una víctima de discriminación por LGTBIfobia o a una muyer víctima de violencia xéneru. Ye más, filando fino, entá ye más grave torgar por asturfobia l’asistencia a una víctima que pue tar en pelligru vital que torgar un conciertu musical.
Énte esta situación, allarmante, vergoñosa y antidemocrática, Andecha Astur pidió al Ministeriu d’Igualdá que corrixa darréu esa política represiva d’atención a víctimes. Y dirixóse a l’Academia de la Llingua Asturiana, comu muérganu defensor de los nuesos drechos llingüísticos, pa qu’intervenga nesti nueu casu d’asturfobia protagonizáu pol gobiernu español, espublizando comu midía urxente una nota pública que tresllade a los asturianos la so posición.
