Andecha Astur desixe a Barbón que fine colos recortes na sanidá pública y garantice inversiones prioritaries qu’atayen la cris d’atención sanitario
La iminente reestructuración del so Gobiernu nun pue ser esculpia p’agravar el déficit d’atención sanitario que trixo’l PSOE
Andecha Astur acaba pidir al Gobiernu’n fonciones d’Asturies que fine colos recortes de presupuestos, presonal, recursos materiales y prestación de sirvicios que carauterizaron estos años la política de Barbón na sanidá pública. La gravedá de la desatención sanitaria algama yá situaciones imperdonables en dalgunos conceyos asturianos, especialmente nel ocidente’l país, tradicionalmente maltratáu pol PSOE en materia de prestación de sirvicios básicos.
Güei l’únicu argumentu valible ye la necesidá urxente de dotar la sanidá pública asturiana d’unos niveles de calidá d’atención que garantice l’exerciciu rial del drechu a la salú, que ta ñidiamente’n riesgu coles polítiques neolliberales que tamos careciendo. Dengún otru argumentu pue tener más pesu qu’ési, nin la cris económica, nin l’avieyamientu la población, nin la inestabilidá que puea contaxar los prósimos cambeos na alministración, cola llegá d’un nueu gobiernu.
La política sanitaria del cesante gobiernu de Barbón llevó a niveles llamentables l’atención a la salú. Barbón emperruñóse’n siguir a los anteriores gobiernos del PSOE, convirtiendo’l recorte costante de presupuestos y recursos na pista d’aterrizax n’Asturies de grandes corporaciones del negociu sanitariu. De manera que’l propiu PSOE vieno executando les polítiques que deseya la drecha, caleniendo sólo diferiencies nel ritmu d’aplicación.
Esto ye lo qu’hai: llistes d’espera imperdonables, centros y sirvicios que piesllen, pésima xestión de presonal, mengua na dotación de recursos, falta contrataciones, ausencia planificación na Facultá Melecina, falta condiciones de contratación respetables pa los nueos titulaos sanitarios, xerencies propies de multinacionales y non d’un sirviciu públicu prioritariu, númberu creciente de pacientes axudicaos a ca titular mélicu y d’enfermería, derivación de pacientes a hospitales concertaos, voluntá de nun abrir diálogos sinceros y democráticos col presonal sanitariu y munchos más aspeutos de la xestión que compete a la Conseyería Sanidá.
Poro, entendemos y sofitamos les protestes ciudadanes y de presonal sanitariu en Tapia, Navelgas, San Martín de Luiña y otros llugares más. Esi maltar social, que deriva yá n’allarma, ye la meyor preba de la tradicional mala xestión del PSOE nesta estaya.
D’ehí’l sintíu la nuesa demanda a Barbón: nun se pue esperar al aniciu’l nueu Gobiernu; dende Presidencia tienen que ponese yá’n marcha los mecanismos políticos qu’aseguren la financiación suficiente pa una atención sanitaria de calidá, a la que tenemos drechu.
Nun ye democrático, nin ético, nin socialista, nin tolerable… que la política sanitaria del PSOE tea poniendo’n xuegu, en dalgunos casos, fasta la propia eficacia de l’atención mélica, xugando colos drechos llaborales y la salú mental del presonal sanitariu y multiplicando los niveles de riesgu vital de la población, poles condiciones d’atención a les qu’obliga la política barboniana.
