L’apueste’l PSOE pola masificación turístico, la monetización rápida y l’engorde la cartera d’empreses privaes, a piques de costar decenes de muertos
Sol acidente d’un ALSA na carretera Los Llagos, tamos ciertosde la profesionalidá del conductor del ALSA acidentáu, de la d’él y de la de sos compañeros. Nun vamos entrar en si l’acidente lu prevocó l’estáu la carretera, magar que ca poco hai tresnar fundimientos del firme, muries d’escollera y el drenax. Nun vamos detenemos en si se cruciaron o non dos autocares. Porque la clave del acidente nun ta neses custiones, sinón nel modelu col que PSOE y ALSA esploten turísticamente’l Parque Cuadonga.
La carretera Cuadonga-Los Llagos, CO-4, forma parte de la rede carreteres d’Asturies; tien un desnivel superior a los 1.000 m. y una dura ascensión de 14 km apinaos de grandes curves y tramos enforma pindios, que suel entardase 30 minutos en recorrer, si les condiciones climatolóxiques son favoratibles.
Nun se puen emplegar los grandes autocares d’ALSA, de 16 a 18 tonelaes/vehículu, nuna carreterina de 5’35 m d’anchor, porque cuandu se crucien dos autocares sólo queda un marxe llibre de 17’5 cm per ca llau la calzá. Nun se pue someter a una carreterina d’alta montaña a la tensión que representa un tráficu diariu de fasta trenta y cincu autocares de gran tonelax, que ca díi pasen pel mesmu llau, tienen que detener el so pesu sol mesmu borde la carretera… Una ruta na que los conductores tienen que dir verbalizando pela radio’l puntu pel que van, pa facer por cruciase namái en dellos sitios estratéxicos.
Sicasí, el Plan d’Acesu al Parque Cuadonga lleva vixente dende 2005, cuandu por primer vegá se punxeron d’alcuerdu ALSA, arzobispáu y Gobiernu d’Asturies, formalizando un monopoliu de tresporte de viaxeros a los Llagos que fonciona la mayor parte l’añu y rentabiliza n’esclusiva la multinacional de los Cosmen, una de les dinastíes más riques del Estáu. Teniendo’n cuenta los precios del viax (9 € adultu, 3’50 € menores de 12 años) y los millones de viaxeros tresportaos, los ingresos que con públicu esclavu pon el PSOE en manes de la dinastía Cosmen son bultables. Sicasí, entovía toos ellos dicen que l’acesu n’autocares determinóse “p’asegurar la sostenibilidá d’esti enclave únicu”.
El modelu turísticu que’l PSOE tien p’Asturies ye sólo la monetización rápida de los enclaves turísticos, facilitando grandes ingresos a dalgunes patronales (tresporte viaxeros, hotelería, hostelería…), y ensin reparar nos daños que’l turismu masificáu causa nel mediu ñatural y nes formes de vida de la población residente. Ehí tenemos el Parque Cuadonga, onde se permite l’acesu llibre del turismu a cambiu de que paguen el billete a los Cosmen. Pero ehí tenemos tamién lo qu’asocede’n munches partes d’Asturies, especialmente na costa oriental, onde’l turismu ta echando a la población mozo de les so villes, encareciendo tremendamente la vivienda, estropiando los niveles de calidá de vida, saturando los sirvicios públicos básicos, xenerando sólo puestos de trabayu temporales y dafechamente precarios…
Na carretera Los Llagos despeñóse la política turística de Barbón. Y él mesmu chamuscó la esperanza de cualisquier solución de la man del PSOE, cuandu salió a defender a voces el monopoliu que los Cosmen tienen en Cuadonga y a dicir que la Santina ficiere’l milagru d’evitar muertes nel acidente. Vergoña de presidente.
Barbón y el PSOE nun convocaron una reunión urxente del Consorciu Tresportes. Nun suspendieron el tiempu suficiente’l sirviciu d’ALSA a Los Llagos. Nun espublizaron nengún informe téunicu sol estáu la carretera CO-4. Nun quieren llimitar l’acesu a los aparcamientos del Parque nin el númberu visitantes diarios a Los Llagos. Nun camienten sostituyir los autocares mostru d’ALSA por vehículos de menor pesu y dimensión. Nun corten de raíz los ruxíos interesaos que promueven un tren cremallera a Los Llagos. Nun tienen nengún plan p’atayar los efeutos que la contaminación atmosférica ta teniendo yá na contorna Los Llagos. Nun gueten denguna política estratéxica pa diversificar los ingresos na fastera. Nun dan acabu a l’apaición de basoria’n Los Llagos. Nun faciliten la participación social na regulación turística nin na ordenación d’aquel territoriu.
A estes altures ye nidio que Cuadonga tien alternatives pa un futuru meyor. Pero’l PSOE nun les va facilitar. Adrián Barbón pa Cuadonga nun ye más que’l mayordomu que curia’l monopoliu los Cosmen y el molacín que s’arrodiella nos sermones franquistes del arzobiespu.
