Los versos d’Andrés Solar marcaron un homenaxe, nel que participaron dellos compañeros de militancia nel ENA, y que resultó especialmente emotivu,
Como davezu, l’homenaxe a Andrés Solar resultó especialmente emotivu, tantu pola participación d’antiguos collacios del Ensame Nacionalista Astur, organización de la que foi fundaor, como polo qu’elli mesmu representa na so vertiente humana y política y que tan bien queda espeyao na so obra lliteraria.
La intervención política tuvo a cargu de Llucía Fernández, que siguió los versos de ‘Falando Contigo’ pa facer un analís políticu y marcar una llinia política d’actuación y compromisu con esti pueblu y esti país.
Intervención de Llucía Fernández
Traxicamente fináu con namás 29 años, na so curtia vida Andrés Solar amosó una capacidá creativa, una claridá mental y una capacidá de compromisu pa cola causa asturiana estraordinaries.
Amás de poeta, Andrés fore miembru fundaor del Ensame Nacionalista Astur, presentándose por esi partíu como candidatu a la Xunta Xeneral, foi profesor de llingua asturiana na UP de Xixón, espublizó articulos en prensa, ganó premios lliterarios, foi miembru de l’Academia de la Llingua, collaboró col grupu Xaréu Títeres de teatru, foi tesoreru de l’Asociación d’escritores Asturianos y miembru de Conceyu Bable y de Xunta pola Defensa de la Llingua Asturiana, siendo en tou momentu un referente pola so implicación pa col país, la so capacidá de trabayu y les sos cualidaes presonales.
Esto ye un brevísimu resume de quien ye Andrés. Pero güei nun quiero falar d’elli, quiero da-y voz, dexalu falar y convidavos a sentilu. Pa ello convídovos a acercavos y lleer un de los sos poemes.
Falando Contigo
Toi buscando la manera de dicite
qu’hai milenta razones que se llamen como tu.
Y qu’esperen por ti, qu’esperen por ti.
A vegaes camiento cansáu
que nin siquiera sabrán que tuviemos equí,
asoleyando un país que cayó una nueche a la mar
, y na mar y na nueche lu quixeren dexar.
Nin siquiera sabrán que tuviemos equí
cola voz y les manes falando d’amor,
alando de ti, falando de ti.
Pero ye igual,
hai que facer del argayu un fueu,
del vientu un hermanu qu’esparda’l calor,
qu’esparda’l calor.
Hai que siguir asina y equí.
Hai que siguir,
hai que siguir
Agora voi facer daqué que los poetes diríen que nun debe facese pero que nesti casu considero importante. Voi parame no que diz el poema, facelo propio y compartilo con vosotros.
Toi buscando la manera de dicite
Qu’hai milenta razones que se llamen como tú
Qu’asperen por tí
Tamos buscando la manera de llegar al pueblu asturianu enteru, face-y saber que les mios razones son ellos, que lleven el so nome. Y qu’esperamos por ellos.
A vegaes, camiento cansáu qu’ellos
Nin siquiera sabrán que toviemos equi
La nuesa llucha, ye cierto, nun aporta munches vegaes al pueblu asturianu, gracies en bona parte al llabor de silenciamientu de la prensa oficial, a la dificultá pa llegar a la xente, ye cierto… cuantos nin siquiera sabrán que toviemos equi. Dependemos de la nuesa voz, de la nuesa capacidá de cuntar, de compartir, pa que lo sepan.
Asoleyando un país
Que cayó una nueche na mar
Y na mar, na nueche
Lu quisieron dexar
Ehí mos quieren. Fundios, a escures, apagaos.
Nin siquiera sabrán
que toviemos equí
Cola voz y les manes falando d’amor,
falando de ti
D’eso se trata. D’amor. Amor a un pueblu enteru, a una xente, a una llingua, a una tierra y a caún de los tus que la moren. A un país.
Pero ye igual, hai que siguir
Y esti ye’l vraeru mensaxe importante. Ye igual, hai que siguir.
Hai que siguir faciendo
Del argayu un fueu
Y del vientu un hermanu
Qu’esparda calor
Hai que siguir. Malque a vegaes cueste, mal qu’argayemos, malque paeza que nun saben que tamos equí, malque seya cansao y a vegaes duro, malque nun apeteza. Abandonar nun ye una opción, rendise nun ta nos nuesos planes. Hai que siguir. Porque esti país, esti pueblu, merez quien lu defienda.
Hai que siguir, asina y equí
Hai que siguir, hai que siguir
One thought on “Andres Solar: «Hai que siguir, hai que siguir»”