- Andecha Astur llama a participar nos actos del Conceyu Abiertu pola Paz y na comemoración de la proclama soberanista del 25 Mayu
Nel contestu estremadamente militarista y proespañol del momentu, con una Asturies tomada poles Fuercies Armaes españoles, na que’incluso los mesmos centros escolares públicos tan dando cabida a actividades castrenses y españolistes, Andecha Astur considera que la reivindicación del 25 Mayu, como fecha hestórica na que la Xunta Suprema declaró la independencia d’Asturies y la Soberanía del Pueblu Asturianu, tien que ser más que nunca una demostración de xunidá del conxuntu de la sociedá asturiana en defensa de los sos drechos, hestoria ya identidá colleutiva.
Ello asina, y pesia que dende va años Andecha Astur vien realizando movilizaciones propies nesta fecha –na que tamién cellebramos el Díi d’Andecha-, nesta ocasión fai un llamamientu a participar nes dos convocatories esistentes nesa xornada: la del Conceyu Abiertu pola Paz, escontra l’actu de les Fuercies Armaes españoles, na Plaza’l Paragües d’Uviéu, y la del Movimientu 25 Mayu na Sala Capitular de la Catedral d’Uviéu, comemorando la proclamación de soberanía del 25 Mayu de 1808.
Per otru llau, y frente a la cellebración istitucional del ‘Principado’ nesta fecha de lo que llamen el ‘Día de la Bandera’, Andecha Astur considera tou un trunfu qu’esa istitución impuesta dende Madrid se vea obligada a asumir la trescendencia hestórica del 25 M, pero denuncia lo que nun ye más qu’un intentu de remanar el so significáu. El 25 M ye’l Día de la Soberanía Asturiana, porque esi díi de 1808 la Xunta Suprema proclamó la independencia d’Asturies y la Soberanía del Pueblu Asturianu, muncho más importante y trescendente que l’asunción d’una bandera.
A la fin, dende Andecha Astur reivindicamos de nueu la necesidá de converxencia y xunidá del conxuntu del soberanismu/asturianismu de izquierda/progresista en propuestes lo más xunitaries posible qu’ufierten a la sociedá asturiana alternatives viables nes que poder enfotase y participar nel necesariu procesu de tresformación política y social que precisa’l nuesu país.
